Daniel Álvarez Prendes: Con esto y la Santina…

Llevantéme esta mañana y tenía puestu un sombreru de cowboy. La boca seca del güisqui d’anuechi y negruzca pol tabacu de mascar. Les camperes enllenes de polvo. Punse la radio y sonaba el grupu gozoniegu Skama la Rede. Dicíen al son d’un ritmu folixeru que talmente paecía que, nesta tierra na que nos tocó vivir, colos Premios Príncipe y la Santina yá sacábemos pa dir tirando. Ensin mayor llargura de mires, ensin mayor esmolecimientu por cómo vamos facer mañana.

Mines que venden carbón importáu como propiu y cobren ayudes publiques por ello, construcciones de l’Alministración que superen en sobrecostes a la magaya Gürtel y nadie nun gurgutia, medios con conteníos n’asturianu namás que cuando-yos dan perres… Si ún llega equí y espeta que-y parez pan pa hoi y fame pal otru día mantener sectores productivos, grandes y pequeños, a golpe de subvenciones a fondu perdíu, queda cuando menos de neocon, de lliberal o de castrón. Pero habéis perdóname: nun-y veo valor nengunu, nin social nin productivu, al caltener en muerte cerebral una cadarma económica que va esbarrumbar ensin remediu el día que dexen d’apurri-y perres d’Europa. ¿Que les mines de Vitorino Alonso siguieran vives unos añucos a costa de vender como propiu carbón importáu ye bono o malo? ¿Que les empreses que habíen de sustituir a la minería pesllaran enantes que los últimos pozos ye mala suerte?

Parezme que nun paga la pena, que, meyor que danos pexes, habíemos aprender a pescar, que los presupuestos que hubo de marafundiar pa xustificar gastos anuales meyor los gastábemos en esbillar una economía sostenible de verdá. Cuando les perres te caen del cielu, como fue el casu de la nuestra tierra, y yes cortu de mires, como suelen ser los nuestro políticos, lo más normal ye que pierdas el xacíu del valor de les coses. Tou nuevu ricu lo que quier son coses grandes y llamatives, da igual que mañana nun tengas con qué manteneles. Calatravas, Niemeyers, superpuertos… Y asina, en vez de sentar les bases d’una economía real y non volátil, se suel gastar el presupuestu públicu por gastalu, pa que nun lo recorten pal añu que vien.

Ye bastante tarrecible la falta de planes de futuru, a mediu y llargu plazu pa la mayoría de sectores, sacante la minería, que tien fecha de caducidá dende hai delles décades. La iniciativa chiringuitera que nun suel resistir un analís de calidá y de vitalidá, y quienes nun tiene el carné apropiáu d’esti sistema de turnu y vez, sufren les mil y una pa siguir vivos y produciendo.

Un exemplu: esta revista. Nació ensin pedir permisu, fizo los númberos, buscó los medios y tiró p’alantre. Nun-y debe nada a naide, nun tien que mordese la llingua por nada nin combayar con nengún, y morrerá cuando los llectores decidan que yá nun val los euros que paguen por ella. Ta enllordiada hasta’l gañote na voráxine de publicaciones de tou pelaxe, critiques, satíriques, culturales, polítiques, pero equí sigue. Ta falta de publicidá que faiga más fácil la so andadura, pero equí ta, metía dafechu nel barru y dando guerra.

Por suerte o por desgracia tocóme agora tamién tirame de cabeza a la llamarga mercantilista. Quedo plasmáu colo que veo. La mentalidá probetaya y curtiuplacista de quienes manden, el cosmopaletismu de los que aspiren “abrirse al exterior”, la falta de control sobre les perres públiques que sirven pa financiar economíes privaes, lo mesmu pa contar mediu millón de tonelaes de carbón que la tirada d’una publicación.

Nun me parez progresista, nin tresformador, nin sostenible endosar cheques en blanco p’afalar la economía ayena, ensin control públicu nin garantíes. Los trabayadores d’esti país nun podemos pagar la cuenta d’unes empreses que mos dan la patada namás dexen de llevar perres públiques, y davezu, incluso mentantu siguen llevándoles. Cómo me jode tar partiéndome los cuernos pa ver cómo otros lo lleven calentino por facer tovía nun sé qué.

Lo dicho, neocon. Voi llamar a G. W. Bush a ver si volvemos quedar esta tarde pa pegar unos tiros col Winchester y poner les pates enriba la mesa.

PUBLICADO EN ATLÁNTICA XXII Nº 31, MARZO DE 2014