La oficialidá y la «escusa chocante» pa nun sofitala nel parllamentu asturianu

Los voceros parlamentarios, el dia del alderique nel Plenu.
Artículo publicado en el número 60 de nuestra edición de papel (enero de 2019) como parte del monográfico sobre el éxodo juvenil
Redacción
@AtlanticaXXII
Suponíase que 3/5 partes de los diputaos del parllamentu asturianu sofitaben la oficialidá. Pero a la hora de pasar de les pallabres a los fechos, cuando, el 23 de payares pasáu, se llevó a la cámara la propuesta de reforma del estatutu d’autonomía pa inxertar la oficialidá, saltó la sorpresa. «Nun se llegó a debatir, y non porque l’asturianu o’l gallego-asturianu nun tengan entidá abonda, non porque la sociedá asturiana nun tea preparada pa ello, sinón pol votu en contra de 30 diputaos y diputaes a la mesma toma en consideración del asuntu pola cámara autonómica», llamenta Xosé Candel, de la Xunta pola Defensa de la Llingua Asturiana.
La torga principal, argumenta darréu, llegó dende les files socialistes: «Al paecer creíemos nós más na democracia interna del PSOE d’Asturies que la propia executiva de la FSA, que quixo más incumplir un alcuerdu aprobáu nel so últimu congresu que contrariar al grupu parllamentariu saliente y dio por válida la escusa chocante de que se presentaren con otru programa».
Dende la Xunta pola Defensa de la Llingua Asturiana, sicasí, apunten que p’algamar la oficialidá la única vía posible pasa per declarala nel estatutu d’autonomía al traviés d’una reforma que torguen «el tacticismu de los partíos políticos y la so falta de coherencia colo que dicen defender». Un pilancu qu’impide la tramitación y qu’empeora la «situación actual de desigualdá y minorización de les nueses llingües».
D’ehí qu’unu de los principales oxetivos de la organización seya presionar pa que les formaciones que dicen sofitar la oficialidá lo fagan de forma inequívoca ya inxerten nos sos programes la reforma del estatutu d’autonomía: «Nun valen declaraciones vagues o endolcaes con axetivos ambiguos que puedan esconder una retayada de los derechos o una voluntá de posponer más entá esti asuntu que tantos años de retrasu lleva».
Pa simplificar lo más posible’l procesu y col sofitu y asesoramientu «d’un garapiellu de xuristes», cuenta Xosé Candel, la Xunta pola Defensa de la Llingua Asturiana fizo una propuesta de cómo habría quedar l’artículu 4 del estatutu d’autonomía pa facer posible la cooficialidá:
1. L’asturianu y el gallego-asturianu, como llingües propies d’Asturies, tienen, col castellanu, el calter de llingües oficiales.
2. Los poderes públicos d’Asturies, atendiendo a la realidá sociollingüística del asturianu y del gallegoasturianu, han garantizar el derechu a conoceles y usales.
3. Una llei de la Xunta Xeneral ha afitar los términos y ámbitos del usu oficial de les llingües propies d’Asturies y ha fixar les zones d’usu predominante d’entrambes.
4. Nenguna persona va poder ser discriminada n’Asturies pola llingua que llibremente escueya pa comunicase.
Dende la Xunta, amás, destaquen que «la sociedá y les llingües propies d’Asturies tán preparaes pa la oficialidá». Y que sobren les escuses porque too apunta pa la oficialidá. Dende los principios éticos y les recomendaciones internacionales a los argumentos culturales y de rentabilidá económica. «Hai razones a esgaya pa facelo», sentencien.




SUSCRIPCIÓN EN PAPEL
A través de este enlace, del teléfono (637259964 o 984109610) o del correo letrasatlanticas@gmail.com
You must be logged in to post a comment Login