Anna Gabriel: “La situación nun se va a camudar enxamás dende les instituciones”

Anna Gabriel nel Llar La Llegra d´Uvieu. Semeya / Pablo Lorenzana.

Anna Gabriel (Sallent de Llobregat, 1975) ye militante de la CUP (Candidatura d’Unitat Popular) y ocupa, coxunturalmente como-yos presta dicir a elles, el cargu de diputada nel Parlament de Catalunya. Acaba de tar n’Asturies, onde impartió una charra nel Llar La Llegra d’Uviéu, espaciu unitariu de la izquierda soberanista asturiana, como actu complementariu nel programa del Día de la Mocedá Revolucionario (DMR 2016) entamáu pola organización xuvenil Darréu. El so títulu foi “Feminismu, cuestión de xéneru y medios de comunicación” y sobre ello y l’actualidá política falamos nesta entrevista.

Testu Iyán González

En xineru d’esti añu moces y muyeres de les organizaciones de la Esquerra Independentista –de la que forma parte la CUP– salen en rueda de prensa denunciando una folada d’insultos y agresiones machistes tres les negociaciones pa la investidura del nuevu President. Pasaron dellos meses d’aquella rueda de prensa, que podríemos tildar de “distinta” a lo que tamos avezaos a ver nos medios, ¿podemos falar de continuidá, de cambios o d’agravamientu nestos ataques?

Paezme que foi una rueda de prensa que xeneró munchu impautu non sólo nos ámbitos militantes. Mesmamente, dende l’ámbitu periodísticu, sabemos que causó impresión a les persones que cubrieron l’actu pol formatu qu’escoyimos, al poner les nueses propies voces pa lleer los insultos que nos tuvo dedicando mediu mundu. Nesi intre yéremos conscientes de la necesidá de visibilizar esos insultos que yeren llanzaos haza nós polo que tábemos faciendo nel escenariu políticu públicu pero, sobremanera, yera una obligación facer esta rueda de prensa pa poner enriba la mesa la realidá de milenta muyeres que viven tolos díes humildaciones y insultos y que nun tienen la posibilidá de denuncialo de la mesma manera. Lo que teníemos claro yera que la rueda de prensa nun diba tener un efeutu reparador o solucionador y, efeutivamente, nun pararon los insultos nin los ataques. Amás, inda hai munchu silenciu y falta de denuncia dende otres formaciones y les instituciones públiques sobre esta campaña d’insultos machistes que carecen les muyeres nestos ámbitos. Nesi sen nun podemos facer l’anuncia de que ganáremos pero yera una obligación pa nós el plantegar esta batalla nesti momentu.

Fala de la importancia de los medios nesta murnia realidá que viven les moces y muyeres. ¿Cuálu ye’l papel de la prensa a la hora d’amplificar, llexitimar o crear les condiciones pa que se produzan estos ataques machistes haza ustedes, especialmente nel ámbitu políticu?

Creo qu’en xeneral, si analizamos el panorama mediáticu de la prensa estatal, a qué corporaciones pertenecen esos medios, quién-yos paga, qué intereses hai tres d’ellos, vemos un mapa que ta diseñáu pa consolidar los intereses del sistema, anque a vegaes nos paeza qu’hai dalgunos que dan voz a lo “alternativo” –“alternativo” qu’a la fin nun lo ye tanto como se tiende a indicar per parte de dalgunos–. El panorama mediáticu ye llaceriosu, a nivel de medios públicos y tamién privaos, y por eso nun ha chocanos que la política comunicativa tea davezu basada na desinformación, intoxicación, distorsión o silenciamientu non sólo no tocante al papel de la muyer o les reivindicaciones feministes sinón tamién coles posiciones que tienen que ver con plantegamientos anticapitalistes o independentistes que vienen dende la radicalidá de la izquierda, que faen por ridiculizar. Por exemplu, la manera de la que se fala del asamblearismu ye inaceptable. Los medios debieren dicir que nel nuesu país la lóxica d’organización que tamos trabayando ta basada n’otres formes y valores d’horizontalidá y non invertir recursos y tiempos infinitos n’afirmar que ye imposible que nuna asamblea se pueda empatar o que foi manipulada ensin nenguna base pa dicilo. Ye un intentu pa torgar que s’espardan eses maneres de facer política y, tamién, pa intentar creanos un complexu qu’estigmatice les nueses propies formes d’organización pa que les camudemos por otres porque, según los medios quieren facer creyer, “el mundu nun nos atalanta”. Esti papel perversu de los medios de comunicación ye mui peligrosu y poro, tenemos que tener siempre a Malcolm X presente y la so reflexón sobre’l papel d’una prensa que pudiere facer qu’odiáremos a la oprimida y nos punxéremos del llau del opresor.

Tamién fai una defensa de la militancia como manera d’entender la so vida y la de cualesquier persona qu’aspire a tresformar la realidá que nos arrodia. Fálase muncho nestos tiempos de cómo compatibilizar esti activismu cola vida mesma, especialmente nel casu de moces y muyeres. ¿Cúala ye la so opinión y esperiencia?

Bono, en primer llugar, la manera d’una mesma de vivir la vida tampoco pretende imponese a la del restu pero sí ye cierto que cuando una siente a Hebe de Bonafini n’aquel discursu nel que diz que “Mentanto heba una sola neña nel mundu, una sola, que pase fame tendremos que lluchar” -y nun falamos d’ún, falamos de millones-, siénteste interpelada. Y nun falamos namás de neños y fame: falamos de les miles que queden na fuesa común del Mediterráneu, de persones recluyíes en campos militarizaos en Grecia, de neños y neñes esclavizaes nes mines de Chile y de pueblos orixinarios que ven les sos tierres arrampuñaes. Si too esto te toca no más fondero, la forma más normal de tar nel mundu ye facer por combatilo tolos díes y, entós, toles hores paecen poques. D’ehí p’alantre hai munches opciones: nos movimientos de llucha unes fueren imprescindibles, otres mui importantes y toes podemos sumar y ayudar. En cualesquier casu, creo que tamién ye una forma de lliberación de la muyer la que plantega que quier abstraese d’esi rol que tenemos afitáu y que diz que de manera inevitable tenemos que tener una familia, reproducinos de forma biolóxica y dedicar parte del nuesu tiempu a unos cuidaos construyíos. Dalgunes decidimos lliberanos d’eses obligaciones, que de xuru que tamién son placeres en bona parte, porque nos apetez dedicar el nuesu tiempu a construyir un mundu meyor dende otros ámbitos. Paga la pena y ye una manera de tar nel mundu maraviosa anque tengamos munches vegaes represión y castigu. La militancia ye la manera de conocer a la meyor xente del mundu y eso ye un privilexu y una ayalga, y por eso facía una invitación a la xente a que viva comprometío y activo.

Camudando de tema, na CUP, el referente eleutoral de la Esquerra Independentista, tán agora mesmo metanes d’unes negociaciones sobre los presupuestos con un referéndum pola independencia enriba la mesa. ¿Cuála ye la so posición y perspeutives nesti momentu y nel restu d’espacios políticos del país?

Nós ficimos un plantegamientu en xunetu, tres la enmienda a la totalidá de los últimos presupuestos, nel que diximos que debiéremos asitiar el referéndum nel horizonte pa pone-y igua de manera definitiva al conflictu democráticu, porque les eleiciones plebiscitaries asitiábennos nuna lóxica de falta de llexitimidá, dende la persepeutiva estrictamente democrática, al contabilizar la  xente qu’avalare’l sí a la independencia. Tamién pa finar cola cultura del “procesismu” y esa nebulosa qu’esistía sobre la llexislatura entrante. Tamos contentes nel sen de tener puesto’l referéndum nel camín inmediatu, anque somos conscientes de qu’una cosa ye arrincar el compromisu y otra implementar los pasos que faen falta p’asegurar l’exerciciu d’esi drechu d’autodetermín. Eso ye agora lo que más nos esmolez. Poro, los presupuestos tendríen que tar diseñaos pa ser un instrumentu que garantice la celebración d’esi referéndum, d’esi campu de participación democrática, y, dende la nuesa postura, ganalu. Nós entendemos que precisamos unos presupuestos que permitan entamar eses primeres fases d’alderique sobre’l referéndum y, por supuesto, tamién pasa ensin dulda polo que nós llamamos “les trés R”: reversión de los retayos, reversión de les privatizaciones y recomposición de la educación pública. Estes cuestiones son les que nós interpretamos que son precises pa identificar la independencia con un proyeutu políticu, social y económicu que pague la pena. Tamién amestábemos nesi puntu una batería de propuestes de tipu fiscal pa plantegar que los que más tienen más paguen porque, anque paeza increyible, tenemos un sistema nel que pasa lo contrario y nel que mentanto unos paguen menos y evaden, a les clases populares tán afogándoles al extremu. Ye xustamente nesti puntu onde tenemos más dificultaes con una parte de Junts Pel Sí anque esiste una mayoría amplísima de la sociedá catalana, según toles encuestes, qu’entiende qu’esta midida tien tol xacíu del mundu. ¿Vamos consiguir que too Junts Pel Sí entienda qu’esto ye imprescindible? Nun lo sé, pero en tou casu la militancia de la CUP decidirá si avala o non los presupuestos. Nun nos sentimos n’absoluto obligaes a votar esos presupuestos anque se nos amenace con nueves eleiciones si nun lo facemos. En cualquier casu, creo que saben bien que’l xantaxe con nós nun ye una bona receta.

Anna Gabriel. Semeya / Pablo Lorenzana.

¿Ye posible la construcción d’una república catalana xusta socialmente nel contestu estatal y global ensin prauticar desobediencia o desobediencies?

Abúltame imposible plantegase’l construyir nada, non sólo nel tarrén de ruptura col estáu español a nivel territorial sinón tamién construyir más drechos o un horizonte distintu, ensin desobediencia porque’l statu quo deféndese con una batería de midíes llegales que faen imprescindible’l desborde. La desobediencia en xeneral ye sinónimu de lluchar por avanzar dende una perspeutiva d’algamar drechos sociales, democráticos y de confrontar col estáu. Hai una entrevista mui recomendable de l’alcaldesa de Berga, Montse Venturós, n’El País que fala d’ello: ye imposible plantegar la rotura del estáu español ensin desobediencia porque l’estáu tien l’imperiu de la llei y los brazos executores que la faen cumplir al serviciu de la unidá d’España. Desbordar eso namás se fai desobedeciendo les sos lleis, pero insisto, non sólo nel planu territorial. Por exemplu, ¿cómo facer que’l status de la llingua asturiana seya  distintu al que ye? De la mesma manera: desbordando’l marcu llegal, desobedeciendo cuotes d’imposición, plantegando iniciatives que surdan dende la comunidá, dende’l pueblu, y qu’anguaño  nun tán reconocíes a nivel de les instituciones. Siempre se fizo asina: nun queda otra.

De 2008 p’acá abrióse un ciclu de movilizaciones sociales mui importante que tuvo estremaes espresiones nos distintos ámbitos nacionales del estáu español. ¿Qué papel o qué potencialidá podríen tener les lluches de los pueblos no que se vien dando en llamar “l’apertura del candáu del Réxime del 78” a la hora de plantegar procesos constituyentes en cada territoriu?

Nesti ciclu de protestes que s’activa dende l’entamu d’esta estafa, que llamen crisis, creo que tamos énte dos peligros. Per una parte, esiste’l riesgu de qu’una vegada agotáu’l ciclu de movilización -que ye bien difícil de caltener permanentemente- pue llegar una sensación de confianza n’aquellos qu’entren nes instituciones entendiendo que van recoyer les nueses esperances, van xestionar de forma amañosa la so cuota de poder y van iguar la situación dende les mesmes instituciones, lo que constitúi un riesgu porque estes tán siempre sometíes a un marcu llegal qu’hai que desbordar. La realidá ye que la situación nun se va camudar enxamás dende les instituciones y muncho menos si nun esiste esi desborde de les mesmes col riesgu de que, si nun se fai, va desencantase a la xente  y face-yos ver que la lóxica de movilización y entrada nes instituciones nun paga la pena pa iguar los sos problemes materiales. Pero, amás, tenemos otru peligru enorme: siguir asitiando la capital del estáu, la capital del centru del poder, la capital de tol entramáu institucional en Madrid. ¿Cómo nun se ta faciendo un discursu nel que, pa desmontar el réxime del 78, nun falamos -amás del bipartidismu, les cloaques del estáu, l’Audiencia Nacional, la sumisión a la Xunión Europea…- de la existencia d’una cartografía de poder completa qu’alluga la capitalidá nel centru del estáu español y que sigue una lóxica colonial respeuto al restu de territorios? ¿Cómo ye posible qu’a la hora de falar de desmontar el réxime del 78 nun se diga que vamos deconstruyir esi centru que too lo quier absorver y que vamos xenerar procesos autocentraos nos estremaos territorios, nes estremaes naciones? Creo que la potencialidá que-y añadiríemos al procesu o procesos constituyentes con esa lóxica sedría enorme. Desgraciadamente abúltame que tamos faciéndolo al revés: les esperiencies de llucha y reivindicación soberanista que pueda haber en Galicia, n’Andalucía,  n’Asturies, nel País Valenciá o nes Illes Balears tán contribuyendo, munches vegaes, a alimentar una direición política que tien sede y, sobremanera, mente y corazón en Madrid. Creo que tendríemos qu’entamar a pensar con una lóxica menos colonial y contribuyir a la ruptura del réxime dende les distintes realidaes nacionales.

Munches vegaes tiéndese a analizar les lluches nel contestu políticu estatal, pero la realidá ye que vivimos nun contestu nel que los papeles de la Xunión Europea y los sos tentáculos, el FMI o la OTAN condicionen totalmente les realidaes nes qu’estes se desendolquen. D’un tiempu p’acó, anque sí se fala del TTIP por exemplu, da la sensación de qu’estos discursos salieren del escenariu políticu y mediáticu. ¿Ye posible construyir soberaníes, pueblos llibres y vides xustes nun contestu como’l d’esta Xunión Europea?

Ye imposible y, amás, creo que ye un reproche que-y tenemos que facer a determinaes izquierdes -y ehí pueo hasta tener en cuenta al PSOE non por ser d’izquierda, que nun lo ye, sinón porque na mente de muncha xente inda s’indentifica como tal-. ¿Cómo ye que nos quieran siguir intentando convencer de que ye posible que podamos tornar a les cuotes d’estáu del “bientar” d’hai 15 o 20 años cola delda d’anguaño y la perda de la capacidá de control sobre la moneda, por exemplu? Paezme que saben que ye imposible y que nun tienen una fueya de ruta que nos lleve a mayores y meyores cotes de satisfacción de lo material de la clas trabayadora nel contestu de la UE. Nun nos dicen cómo van facer pa siguir invirtiendo no público si quieren pagar una delda que ye dafechu impagable. La realidá ye qu’esti estáu nun tien nenguna capacidá pa pagar esta delda que nos obligaron a contrayer: nenguna. Nun entiendo cómo, dende la nueva política, se pue plantegar una nueva lóxica ensin poner enriba la mesa’l salir d’esa Xunión Europea y falando esclusivamente de reformala a partir de -nun sé mui bien- qué correllación de fuercies. Nel alcuentru pola Unidá Popular que ficimos xustamente la selmana pasada, na mesa final tuvimos a xente que tuviere en Syriza y que l’abandonaren pola opción final que se tomare énte la Troika, amás de xente de l’Auditoría de la Delda y tamién representantes del Partíu Comunista Italianu con un apueste y postures mui nidies y ensin complexos: fuera de la UE y fuera del euru podemos entamar a planteganos opciones polítiques y económiques que realmente recuperen soberaníes que devuelvan los mínimos materiales a la clas trabayadora. Esta ye la nuesa posición: creemos que nun ha ser ningún tabú falar d’ello y poner enriba la mesa que tienen qu’esistir alternatives a la UE, al euru, a la Troika y tamién a los sos brazos armaos como la OTAN. La preba ye que la CUP tien 10 diputaos y diputaes con esi plantegamientu ideolóxicu. ¿Quiciabes si nun tuviéremos esi plantegamientu tendríemos 15 diputaes? Nun lo sé. Quiciabes prefiramos tener 10 diputaes nel Parlament siendo clares pa entamar a trabayar dende ellí énte la sociedá estos discursos que tener 15 diputaes siendo ambigües.