Camisetes pa un traxe a la midida del asturianu

El letrado mayor de la Xunta Xeneral, Alberto Arce, xunto a los diputaos de Podemos Andrés Fernández Vilabona y Héctor Piernavieja y el de Ciudadanos Nicanor García na apertura del periodo parlamentariu. Semeya / Pablo Lorenzana.

L’intelectual gallegu Ramón Piñeiro defendió que, en cuentes de centrase n’algamar una sigla propia, el galleguismu tenía que ser tresversal a toles ideoloxíes, una situación que parez empezar acolumbrase na política asturiana.

Damián Barreiro / Periodista.

Los nacionalismos vascu y catalán configuráronse mentes la dictadura como referentes na llucha contra’l franquismu. La situación permitió-yos qu’una vez llegaba la democracia pudieren negociar cara a cara col Estáu l’accesu al autogobiernu. En Galicia la situación foi distinta al tar el nacionalismu desarticuláu. Por eso, baxu’l lideralgu del intelectual Ramón Piñeiro, el galleguismu abellugóse na actividá cultural. El piñeirismu buscó más galleguizar la sociedá y, al traviés d’ella, la política. Una postura que nun entendieron munchos nacionalistes partidarios de la llucha directa contra Franco. Sicasí, na Transición, les idees de Piñeiro fixéronse realidá y la mesma UCD gallega engarróse  con Adolfo Suárez, que quería pa Galicia un Estatutu menor que’l vascu y catalán. Mesmamente, el cabeza de llista d’Alianza Popular nes primeres elecciones foi’l galleguista Gerardo Fernández Albor. Piñeiro tamién formó parte del Parllamentu autonómicu dientro de les llistes del PSOE. Nel so llabor destacó la redacción de la Llei de Normalización Llingüística, aprobada col consensu de tolos partíos.

Mentanto too esto pasaba, a esti llau del Eo l’asturianismu taba en pañales. Too ello nun periodu nel que yá taba claro que’l socialismu diba ser hexemónicu nuna Asturies marcada pola reconversión industrial y la crisis del carbón. La dependencia económica del Estáu punxo les coses difíciles al asturianismu y empobinó’l papel de la FSA como referente de l’Asturies obrera y minera. Nesa tesitura, los socialistes nun vieron la necesidá d’asturianizase. Ignaciu Llope, escritor y miembru de la Fundación Belenos, comenta que’l PSOE asumió los discursos identitarios nes Comunidaes nos qu’estos surdieron d’una ellaboración burguesa. Sicasí, equí, onde l’asturianismu nació dende les clases populares, “refuga d’ello como de la peste”. Pal escritor y xestor cultural Adolfo Camilo Díaz, la FSA, “al igual que’l restu de partíos”, nun tien un discursu específicu pal nuestru país, y añade que les cuestiones identitaries “al marxe de les establecíes” asusten.

La oficialidá diferida de Cascos

A pesar de too esto, el PSOE asumió la protección de la llingua asturiana. Pa ello foi fundamental la presión social del asturianismu naciente, pero tamién el papel de Xuan Xosé Sánchez Vicente, daquella miembru del PSOE y del Conseyu Rexonal d’Asturies. Sicasí, Sánchez Vicente y l’asturianismu acabaron faciendo apueste pola sigla propia y formaron el Partíu Asturianista (PAS) en 1985. Esi apueste tuvo’l so resultáu cola entrada nes instituciones nos años noventa, momentu nel que sofitaron los presupuestos del entós presidente Sergio Marqués y nel que s’algamó la Llei d’Usu del Asturianu. Per otru llau, nesa década y énte’l procesu de reformes estatutaries que se taba abriendo nel Estáu, algamáronse les mayores movilizaciones a favor de la oficialidá. Parecía que’l procesu qu’entamara Conceyu Bable taba trescalando socialmente. Otra manera, y depués de ver que’l PAS podía come-yos terrén, Izquierda Xunida (IX) axuntóse tamién a la reivindicación. Mesmamente, Francisco Álvarez-Cascos, daquella mano derecha de José María Aznar en Madrid, llegó a proponer una oficialidá diferida. El PSOE dixo que non.

Les circunstancies polítiques y la poca capacidá pa enanchar la so base social fixeron que’l PAS saliera del Parllamentu asturianu en 1999, momentu nel que llegó a la presidencia con mayoría absoluta’l socialista Vicente Álvarez Areces. Mentanto, IX renunció a la oficialidá pa dar estabilidá a los Gobiernos socialistes. Pa Camilo Díaz, el d’esti partíu ye “un trabayu puerco que daquién tien que facer”. Afirma que les crítiques a esta formación por renunciar a la oficialidá son “sobreactuaes”. “Una de les lluches d’IX, a la contra de cásique too, vien siendo la oficialidá y nun veo que Podemos o Foru dexaren de facilitar la investidura porque Javier Fernández nun apoyara la oficialidá”, comenta Díaz.

La primera década del sieglu foi escura pal asturianismu. Pa Llope, dar una rempuesta sobre por qué nun foi posible articular un partíu propiu ye dalgo mui enguedeyao, anque fala d’un “cainismu xabaz” que facía del asturianismu “un llugar cualesquier cosa menos habitable” y que xeneraba “organizaciones febles incapaces d’entender los mensaxes de la sociedá”. Con too, señala que la presión y la receptividá de la sociedá permitieron mover dellos milímetros “la ciclópea masa política de la FSA”. Y ye qu’anque l’asturianismu saliera del Parllamentu, la reivindicación siguió na cai. Per otru llau, la industria cultural foi garrando fuercia y munchos mozos y moces teníen a Dixebra o Los Berrones como principales referentes musicales. Tamién había llibreríes especializaes nel asturianu y hasta un selmanariu, Les Noticies, que llegó tener cierta influencia na política llingüística d’esti país. Sicasí, españó la crisis económica y la década segunda vieno marcada pola desaparición de les llibreríes, de les nueches celtes y de Les Noticies. Yá nun había escaparates nos que mostrase y empezó a falase del fin del Surdimientu, colo que se daba por peslláu’l periodu qu’aniciare Conceyu Bable cuarenta años enantes.

Manifestación pola cooficialidá nel Día de Les Lletres Asturianes. Semeya / Mario Rojas.

Mentanto, el Foru d’Álvarez-Cascos ganó les elecciones, mostrando al empar el trunfu y el fracasu del asturianismu. D’un llau, l’exministru llegara a la presidencia con un discursu enllenu de referencies asturianistes. Pel otru, el so apoyu social escenificó la incapacidá d’articular una sigla propia. Según Llope, Foru marca la recomposición en clave asturianista del sistema de partíos, “porque Asturies tien unes característiques particulares derivaes, ente otres coses, de la non resuelta construcción identitaria y el so diálogu conflictivu cola modernidá”. Pa Xosé Nel Riesgo, director de la Fundación Municipal de Cultura de Xixón, Foru supunxo un regresu a los planteamientos de Xovellanos, “del que ye heriede directu l’asturianismu”, lo que pa él ye una preba “incuestionable” de les aspiraciones de Foru pa facer un proyectu de construcción del futuru afitao na identidá, “nel sentíu más rellacionáu colos factores endóxenos del desendolcu económicu”. Con too, l’Executivu forista foi dalgo pasaxero y nes elecciones anticipaes de 2012 los asturianos volvieron da-y la confianza a la FSA. Otra decepción pal asturianismu. A unos esmolecía-yos que Cascos perdiera, mentes qu’otros –los de la esquierda– observaron ablucaos cómo UPyD, partíu fundamentáu nel patriotismu español, algamó un diputáu decisivu pa la configuración de mayoríes. Munchos dieron por muertu al asturianismu. Sicasí, nun taba too perdío.

En 2014, Podemos apareció nel mapa y l’asturianismu supo xugar les sos cartes. Y ye que’l partíu de Pablo Iglesias foi l’abellugu de munchos asturianistes qu’empezaron a trabayar pa que la formación asumiera l’usu del asturianu y la oficialidá. Mentanto, los asturianistes de Foru garraron pesu y convencieron al so líder pa que llevara la oficialidá nel programa electoral. Asina, la cultura asturiana quedó homologada políticamente a la de cualquier país européu, con una formación socialdemócrata y otra conservadora que sofiten unos mínimos pal futuru d’esta identidá. Nel Riesgo afirma que Foru tien un papel crucial nesta cuestión, “porque hasta que nun síamos quién a convencer de que la oficialidá nun ye patrimoniu d’un espectru ideolóxicu nun vamos avanzar. Quien nun quiera ver esto ta usando y abusando de la llingua asturiana como instrumentu d’axitación política, ensin más”, opina Riesgo.

Camisetes pa la historia

En mayu llegaron les elecciones y los resultaos mostraron que 17 de los 45 diputaos  apoyen la oficialidá, un pesu que nun se viera hasta la fecha. Mentanto, na constitución de la Xunta Xeneral, los diputaos de Podemos Andrés Fernández y Héctor Piernavieja, que presidieron la mesa d’edá, llevaron camisetes que reivindicaben la oficialidá. Ún de los implicaos, Piernavieja, comenta que llevales foi una casualidá. “Faláremos de llevar camisetes que sofitaren dalguna reivindicación y dio la casualidá qu’Andrés y yo escoyimos eses”, esplica. Sicasí, esta casualidá supunxo la visibilización d’un cambiu na política asturiana; la xeneración que medró escuchando a Dixebra, que s’escolarizó n’asturianu y que se movilizó pola oficialidá taba dientro de les instituciones. Y los más optimistes vieron n’ello una metáfora mui visual, porque la normalización de la llingua tien que tener n’Asturies un traxe a la so midida, anque sía con camisetes.

La FSA parez que ye sabedora de too esto. Tamién sabe que la época de mayoríes absolutes queda lloñe y necesita dar pasos alantre si quier contar col apoyu d’IX pa gobernar. Como muestra val qu’un independiente miembru de l’Academia de la Llingua Asturiana (ALLA) –institución enfrentada col Gobiernu pola falta d’oficialidá– acaba de ser nomáu conseyeru d’Educación y Cultura. Una de les primeres iniciatives de Genaro Alonso foi entrevistase col ministru d’Educación y solicita-y la creación de la Especialidá pal profesoráu de llingua asturiana. Pa Llope, el conseyeru nuevu amás de miembru de l’ALLA ye miembru d’un Gobiernu de la FSA, “y nun me paez que les polítiques posibles vaigan derivar de la so condición  primera, sinón de la segunda”. Con too, qu’un académicu sía conseyeru “muestra la receptividá social a la identidá asturiana y nun sé si ye un xestu de Javier Fernández o una necesidá interna de la FSA”.

Volviendo a Ramón Piñeiro, l’intelectual afirmó que la mayoría d’edá política del so país llegaría cuando dexara d’existir un partíu galleguista y tolos partíos democráticos foren galleguistes. Queda por ver si la política asturiana va siguir esi camín. Ente les principales cuestiones ta ver si l’usu del asturianu empieza ser dalgo normal. Piernavieja afirma que va convertise en dalgo común y que la so representación  va valir pa sacar alantre munches cuestiones. “Too ello ensin perder la perspectiva de que nun va haber equiparación de derechos hasta consiguir un Estatutu con oficialidá”, diz. Otra cuestión importante ye’l futuru de Foru. Según Riesgo, esti partíu perdió’l votu tresversal, “que voló pa Podemos”. Recuerda los resultaos bonos de Xixón y n’otros llugares y esplica qu’hai qu’esperar a ver el panorama que naz depués de les xenerales, “porque queda muncha historia, con mayúscules, por vivir”. Per otru llau, Camilo Díaz afirma qu’anque haiga 17 diputaos pola oficialidá nun hai nada consolidao y too depende del voluntarismu. “Por eso, va haber que siguir revindicando y pidir a los diputaos pola oficialidá que se sumen a esi movimientu. La llucha sigue”, sentencia.

PUBLICADO EN ATLÁNTICA XXII Nº 40, SEPTIEMBRE DE 2015