El consensu de la infamia

Ignaciu Llope / Aquellos viaxeros, aquellos “curiosos impertinentes” que triaron caminos y caleyes, puertos y cuetos, pueblos, brañes o villes, acolumbraron una Asturies na que l’Antigu Réxime apigazaba y algamaba bien los entamos del sieglu XIX. Una Asturies na que la fame de los aldeanos y campesinos yera la realidá cruel qu’afalagaba la emigración, na que la indolencia, estupidez y galbana de la mayoría de la decadente nobleza asturiana torgaba’l surdimientu de la modernidá una y otra vuelta. Pero esos viaxeros, amás de describir esa Asturies un aquello ténebre, toos en xunto aponderaben la nobleza, la honradez, l’arguyu de la fidelidá a la pallabra dada de los asturianos y asturianes qu’habitaben aquella tierra n’arba del mundu. Una nobleza de calter -en términos de la dómina- que definía una castra de xente noble y antigua, enraigonada na tierra y qu’exercíen la solidariedá cola naturalidá de quien mira en tientes a la muerte. La mesma solidariedá que furnió lo meyor d’ún de los movimientos obreros más potentes y dignos de respetu y reconocencia d’Europa, y qu’irguó ún de los mitos contemporáneos más consistentes, y entá -sí, anque abulte increyible- movilizadores d’emociones y d’identificaciones. Y ye qu’inclusu anguaño, depués d’un sieglu XX devastador y una crisis que n’Asturies vien ser una condición más de la esistencia, la conciencia que la sociedá asturiana caltién de sigo mesma, tien más que ver cola imaxe yá mítica de la combatividá d’un pueblu irreductible que cola realidá. Una realidá que rincha y acaba con esi pacetible suañu d’otros tiempos na imaxe xostra del sucesor de Manuel Llaneza atropando billetes de quinientos euros en baxu la cama.

Y ye que’l balance d’estos últimos trenta y cincu años d’Autonomía marca la fin d’una época, pero pa nada s’acolumbren los tiempos vinientes. La construcción alministrativa y política de l’Autonomía asturiana ye la superficie na que s’inscribe la versión asturiana del Réxime del 78. Amás, un tramáu institucional que de magar la Gran Depresión del sieglu XXI amosara la so cara más gafa, cada vuelta ye más identificáu por crecientes sectores sociales como la causa y espeyu de la ineficacia, el maraflundiu y la corrupción. Un fenómenu ésti enforma perversu, pues la construcción autonómica asturiana de magar los sos anicios foi protagonizáu… por antiautonomistes d’un xacobinismu primariu ya irracional. Asina, tolos potenciales democráticos de la descentralización foron diliéndose nuna trupa rede d’ineficiencia, na que’l nepotismu foi medrando mientres xeneraba una estructura clientelar percibida pola población como insepartable del Estáu de «les taifes autonómiques». Esa rede clientelar foi quien a concitar una adhesión social vergoñante, que tenía la so evidencia más ritualizada na elección sistemática d’alcaldes y cargos públicos una y otra vuelta, chiscaos por sospeches o certeces de corrupción. Y ye que los xestores d’esti artefactu políticu surden de la sociedá asturiana, y son una espresión de la mesma: nun son seres ayenos a les dinámiques sociales asturianes sinón consecuencia de les mesmes.

Poro, nun val agora tres la cayida en desgracia del gran símbolu mineru d’una manera de ser y entender Asturies, sentenciar la muerte simbólica del suxetu pa esconxurar esi consensu de la infamia qu’apodreció estructuralmente a la sociedá asturiana mentanto los últimos trenta y cincu años: porque esi personaxe, yá definitivamente tráxicu, resume na so biografía la mutación colectiva d’una comunidá humana hipócrita y cínica consigo mesma. Y la desllealtá pa con sigo mesmu ye la peor y más destructiva de les desllealtaes pues estrinca dafechu’l respetu y la conciencia que toa comunidá se debe, imprescindible pa construyir un texíu colectivu col que faer vidable una vida bona, una vida que mereza ser vivida. Non, nun hai piedá na hestoria pa les sociedaes qu’arrenuncien a construyise, y que son incapaces de mirase, y reconocese. Agora, nuna turbonada hestórica que pon n’evidencia lo peor d’una arquitectura institucional yá agotada, lo más inquietante ye lo probe de la conmoción social, la indiferencia por agotamientu, seique.

Pensar en cómo describiríen esta Asturies aquellos escéntricos, aquellos maravillosos illustraos que cola so curiosidá, cola so inquietú intelectual mandaben tiempu y trabayu n’entender el mundu, ye un exerciciu mui triste. Porque lo más probable ye que nin arrepararen nesti llugar del mundu, pasaríen de llargu en cata d’esos países, d’esos sitios nos que la xente ye noble y arrogante y saben del valir irrepetible de cada instante y ye arguyoso de la tierra que pisa.

PUBLICADO EN ATLÁNTICA XXII Nº 35, NOVIEMBRE DE 2014