Francisco Álvarez: Sindicalismu

Imaxino que la efemérides va desfilar pel calendariu ensin pena nin gloria, pero estos díes cúmplense cien años del nacimientu de Placido Rizzotto na estigmatizada localidá siciliana de Corleone. Placido Rizzotto vieno al mundu’l 2 de xineru de 1914 como primoxénitu d’un matrimoniu que tuvo siete fíos y yera tovía un guaje cuando hubo de dexar la escuela p’asumir responsabilidaes familiares más propies d’un adultu, por mor de la muerte de so má y del encarcelamientu de so pá, acusáu d’asociación mafiosa. Na Segunda Guerra Mundial abandonó Sicilia pa combatir el fascismu en tierres peninsulares italianes como partisanu de les brigaes d’asaltu Garibaldi, nes que tamién empuñó les armes el gran escritor Italo Calvino, quien nel so cantar Oltre il ponte (‘Más allá de la ponte’) resumió’l sentir d’aquellos homes y muyeres que s’echaran al monte: “Víemos al alcance de la mano, más allá del troncu, el matoxu y la cañavera, la llegada d’un día más humanu y más xustu, más llibre y gayoleru”.

Nun yera esa tierra prometío la qu’aguardaba a Placido Rizzotto na Italia de posguerra. Al volver a Corleone cambió’l fusil pola pancarta y tuvo que siguir lluchando pola llegalidá y polos derechos de la clase trabayadora, contra la mafia y contra los terratenientes, como militante del Partito Socialista Italiano y como afiliáu de la Confederazione Generale Italiana del Lavoro (CGIL), la organización sindical más importante del país. Rizzotto púnxose al frente de los campesinos y los xornaleros pa vindicar y ocupar tierres controlaes por Cosa Nostra, desoyó les amenaces del crime organizao y la mafia acabó con él. En 1948, a la edá de 34 años, foi secuestráu por una reciella de sicarios que lu asesinaron y tiraron a una foxa’l so calabre (los restos nun apaecieron hasta sesenta años dempués). La CGIL respondió a la so desapaición con una fuelga xeneral y dos sospechosos de la so muerte foron deteníos, procesaos y absueltos por insuficiencia de prebes. En 2012 Italia rindió un homenaxe d’Estáu a 42 sindicalistes asesinaos pola mafia, personalizándolu na figura de Placido Rizzotto. Sicasí, el reconocimientu de mayor simbolismu a aquel ex partisanu y sindicalista foi’l de la cooperativa d’agricultura ecolóxica Libera Terra, de Sicilia, qu’empezó a comercializar un vino tinto y otru blanco col nome de Placido Rizzotto. Les uves qu’emplea son de viñeos plantaos en tierres que l’Estáu confiscó a la mafia.

Otru 2 de xineru, pero de 1977, morrió, prácticamente a la mesma edá que Rizzotto, Juan Muñiz Zapico, al caer al ríu Güerna’l coche nel que viaxaba con dos persones más. Juanín Muñiz Zapico, obreru metalúrxicu del conceyu de L.lena, sindicalista de Comisiones Obreres y miembru del Comité Central del Partíu Comunista d’España, dexaba tres de sí una vida consagrada a la llibertá y a la resistencia delantre del réxime franquista. La so historia ye bien conocida n’Asturies y tamién el preciu que pagó na llucha: siete años de cárcel (condenáronlu a dieciocho, pero recibió l’indultu tres de la muerte del dictador Francisco Franco), cinco despidos llaborales, cuatro fuelgues de fame, otres tantes multes gubernatives y dos condenes del siniestru Tribunal d’Orde Públicu.

Valga’l repasu a la vida y muerte d’estos dos sindicalistes, sicilianu ún y asturianu l’otru, pa reconocer el llabor de milenta persones qu’en distintos escenarios y en diferentes dómines diéron-y y dan dignidá y valor a la pallabra sindicalismu. Hai qu’apegase a la épica y al so recuerdu pa fuxir de la tentación de falta-y al respetu a un movimientu tan viciáu y traicionáu nestos tiempos. La Sección Sindical d’UGT nel Centru Territorial de Televisión Española n’Asturies entama una campaña de persecución llaboral contra’l director d’esta revista, Xuan Cándano, por informaciones (informaciones, non opiniones) publicaes nesti mediu de comunicación y darréu busquen la ‘victimización’ denunciando una presunta “campaña de desprestixu” contra’l sindicatu. Nun caen na cuenta de que’l mayor desprestixu pa la so organización y pal movimientu sindical en conxuntu ye que xente como ellos ostenten la condición de sindicalistes, esa que defendieron, empeñando la vida y la llibertá, personaxes tan dignos y honestos como Placido Rizzotto o Juan Muñiz Zapico.

PUBLICADO EN ATLÁNTICA XXII Nº 30, ENERO DE 2014.