Gol a la llingua asturiana

Manifestación en Uviéu pola oficialidá de la llingua asturiana nel cabero Día de Les Lletres en mayu. Semeya / Pablo Lorenzana.

“Los derechos son coses que llogramos cuando somos abondo fuertes pa reivindicalos”. Helen Keller

Denis Soria Fernández. Munchos asturianos qu’estos díes anden atontolinaos col Mundial de Brasil pensarán que toi falando de fútbol. Sicasí, la pichichi del partíu al que me refiero nun ye otra qu’Ana González (conseyera d’Educación) y el pase que permitió rematar l’acción vien de realizalu ciertu periódicu de la cantera, que la selmana pasada robaba la pelota pela estrema derecha del campu. Esti diariu asturianu solmenaba la contienda fabricando una polémica apoyada nel estreñimientu mental d’un grupu de padres d’alumnos de Primaria que dende agora van tener qu’escoyer obligatoriamente ente Llingua Asturiana o Cultura Asturiana. Ente los argumentos coleccionaos nes distintes noticies y entrevistes nun podíen faltar los famosos mitos y prexuicios endémicos contra los que la única defensa posible paez variar ente la depresión, el noxu o la triste indiferencia. Mientres, quédanos contemplar impotentes cómo esta frasca d’adictos al viagra tenta de sacar a baillar a una sociedá inmadura al son d’un discu de vinilu que se-yos debió de rayar hai trenta años, pero qu’inda se resisten a cambiar.

Realmente la decisión de la Conseyería d’Educación nun camuda n’escesu l’escenariu. L’asturianu y el gallego-asturianu en Primaria pasen de ser voluntarios, como yeren hasta güei, a convertise nuna materia optativa pa competir con otra sacada de la manga (Cultura Asturiana) con más pinta de María o d’asignatura de rellenu. Ye dicir, non solo nun se garantiza l’enseñu del idioma propiu a tolos niveles sinón qu’agora ésti va tener que rivalizar cola llei del mínimu esfuerciu. Y pa con too, hai quien tovía ve nello un ataque a la llibertá y una «imposición» imperdonable. ¿Pero de qué llibertá tamos falando? ¿De llibertá de deprendimientu o llibertá d’usu? ¿Y cómo se pue tener llibertá d’usu si nun te garanticen el so conocimientu? Pos va resultar qu’Asturies ye l’únicu llugar d’España con llingua propia -dempués d’Aragón- onde entá se discute la obligatoriedá de l’asignatura correspondiente.

«Así no se dice, güelito»

Buf, ¿cómo va ser l’asturianu obligatoriu? Qu’a ver, Matemátiques o Llingua y Lliteratura Castellanes nun son obligatories, non. Meyor reservamos esi calificativu pa les coses a les que tenemos fobia. Claro que sí, neguemos la existencia del idioma pero seyamos incapaces d’estremar rexistros. Enllenémonos la boca cola defensa de les variantes pa cagar pal asturianu normativu, pero corrixamos a los fíos por cada pallabra dicha nelles. Acusemos a la base social que lu defende de conflictiva y de querer romper la cohesión social, pero miremos pa otru llau cuando los neños menosprecien a sos güelos y los maten a complexos por causa de la nuesa propia inorancia. Sigamos siendo una fábrica d’estranxeros na so propia tierra, que nos va de cine.

Llueu dirán que non, que ye porque nun ye una llingua útil, que ye lo más l’inglés o’l chinu. Casualmente quien realiza esta clasificación obscena ente idiomes útiles y inútiles son les mesmes persones que veten espacios d’usu pal asturianu (que lu inutilicen) na alministración y nel ámbitu llaboral o académicu. Porque que nun nos tomen por idiotes, el fechu de qu’a naide se-y ocurra usar -nin valorar- l’asturianu o l’eonaviegu nun exame o nuna entrevista de trabayu nun ye casualidá, ye consecuencia d’una aversión social que la política llingüística de Gobiernos socesivos encargóse de cultivar. Los mesmos Gobiernos que tanto apregonen la intocabilidá de la Constitución, pero que s’escuden nel artículu d’un Estatutu d’Autonomía que la desobedez en materia de derechos llingüísticos. Los mesmos que nos venden Europa como un espaciu globalizáu y de modernización y al tiempu desoyen los sos informes sobre’l cumplimientu de la Carta Europea de les Llingües Minoritaries, que los ponen pingando. Llegaos a esti puntu nun ye plan ponese a negar la importancia nin la compatibilidá de cualquier otru idioma xunto colo propio, pero cada vez que dende esti entornu se fala de la «utilidá» de les llingües estranxeres tengo la impresión de que vien acompañao d’una invitación sutil a buscar trabayu fuera d’Asturies. Disculpen, pero esto nun demuestra la «utilidá» de les llingües estranxeres, sinón la «inutilidá» d’esta xente pa gobernar y garantizanos un futuru nesta tierra.

Vamos terminar de cuadrar les cuentes ¿Ye casualidá qu’Asturies seya l’únicu sitiu onde se pue ser profesor d’una llingua ensin conocela? ¿Ye casualidá la condición de precariedá del puestu? ¿Ye casualidá que l’anunciu de los trámites pa la creación de la tan esperada especialidá docente -qu’en parte venía d’ameyorar la so situación- tuviere llugar nel fervor de la Selmana de les Lletres? ¿Ye casualidá que la campaña d’estos terroristes de bolígrafu escontra la escolarización n’asturianu se plantegue nestes feches? Como a estes altures valnos más dexar de creyer nes casualidaes teamos sollertes, nun seya que pretendan dar con una mano y quitar cola otra.

Los que llevamos décades sudando la camiseta de la reivindicación llingüística nun podemos evitar pensar qu’esta xugada respuende a unos actos y unos tiempos definíos antemanadamente. Dempués d’esti pulsu nun nos estrañar que la Conseyería se viera na cómoda postura de ceder énte esta polémica, empeorando la situación de l’asignatura, o que pretendieren quedar de salvadores en casu de nun transixir. Quién sabe lo que pueda pasar, de lo que toi seguru ye que definitivamente esti país nun pue siguir permitiéndose la debilidá del so asturianismu políticu y cultural. ¿A qué tamos esperando pa preparar el partíu de vuelta?