La crisis del refalfiu

Miguel Rojo / Tengo una semeya marcada na retina como si fuera fierru amburante: nella vense unos cuantos neninos negros de rodíes bebiendo agua nun bebederu de ganáu metanes el desiertu. Les sos pieles refulxentes baxo’l sol, les cabeces humillaes enriba’l pilón, la mirada sorriente d’ún de los guajes… Al pie de la fotu vien un testu que, más o menos, echa en cara que l’home ande enguedeyáu en topar agua en Marte escaeciéndose de buscala nel so propiu planeta. L’ entrugue que se fai ye si en llugar de preguntanos si hai vida intelixente en Marte habría que dir pensando si la hai na Tierra.

(Y llueu ta l’enguedeyu esi de los refuxaos)

Yo creo que sí que la hai, intelixencia, y muncha, pero ye una intelixencia poco intelixente que nin siquiera llega al mediu plazu y que ta totalmente mediatizada pol refalfiu y el miedu a perder un tipu de vida a la que yá tamos demasiáu avezaos.

(Y llueu ta l’enguedeyu esi de los refuxaos)

Ye difícil almitir otra intelixencia más escosa qu’ésta nun mundu globalizáu como’l nuesu onde hasta los más probes son quienes, por medio la tecnoloxía moderna, echen una güeyada, día tres día, nueche tres nueche, a esti “paraísu” que se topa ehí tan a la vera… ¿A quién, nesa mesma situación, se-y puede negar la obligación de dase un garbeo, un take a way on the wild side pel otru llau de la muria?

(Y llueu ta l’enguedeyu esi de los refuxaos)

Y ye que, si nun fuera pol apigazamientu que nos produz el refalfiu de la nuesa sociedá, sedría pa plantegase urxentemente una solución anque solo fuera por necesidá egoísta… La World Watch recuérdanos dellos datos bien impresionantes, anque yá sé qu’esti tipu cifres solo sirven p’alarmanos xusto’l tiempu que les lleemos:

-Los países ocidentales gastamos en comida pa mascotes 17.000 millones de dólares frente a los 19.000  que-y dedicamos a engarranos contra la miseria.

-Marafundiamos 4.000 dólares más en cruceros qu’en potabilizar l’agua de los países que tan en víes d’espoxigue.

-La fame mata cada añu más de 50 millones de persones, equivalentes a una Segunda Guerra Mundial completa.

-Cada vaca de la Unión Europea tien un subsidiu de 760 €; un nenu africanu recibe 6.

-Escolarizar a un nenu probe por añu cuesta 23 dólares, mantener operativu a un soldáu, 13.000.

Y tornando al entamu, a la semeya de los guajes bebiendo agua d’un bebederu, Unicef asegura que p’algamar la potabilización d’agua, la educación básica y controlar les principales enfermedaes infantiles del planeta bastaría con 250.000 dólares durante 10 años, una cantidá inferior a lo que costó l’autopista Tokio-Kobe o lo que nos gastamos los europeos en vinu o los americanos en cerveza.

(Y llueu ta l’enguedeyu esi de los refuxaos)

Les sociedaes humanes manifiesten una acusada tendencia a comportase como organismos vivos y por tanto a siguir les mesmes pautes de conducta evolutives qu’éstos. Ye dicir: nuna situación de recursos llimitaos y de competencia pola supervivencia, nuna engarrada pol espaciu físicu, igual que-y pasa a los seres vivos, sobrevivirán solamente aquelles sociedaes más fuertes. Esto ye darwinismu puru. Y anque munches veces entendemos por sociedá fuerte a la tecnolóxicamente más avanzada o militarmente más poderosa… La más fuerte ye aquella que ta xuncida alrior d’unos valores morales o relixosos o familiares o del tipu que seya (que nun tienen por qué ser necesariamente bonos) frente a otra sociedá anestesiada nel so refalfiu insolidariu y yá perdida de cualquier referente orixinal que la fexo poderosa… Basta con echar una güeyadina a la Historia y abrir pola páxina que fala de la caída del Imperiu Romanu frente a los que llamaben despectivametne “bárbaros”, pa entender de lo que toi falando.

Y llueu ta l’enguedeyu de los miles de refuxaos, consecuencia de tolo dicho enantes, glamiando pacíficamente les faraguyes de les nueses meses a la espera de los atilas o, meyor tovía, de los almanzores que devuelvan un poco de xusticia a esta civilización nuesa qu’anda a la gueta agua en Marte y dexa morrer de sede a les persones que viven ehí, al otru llau’l mundu, anque esi otru llau tea a non muncho más de 17 kilómetros.

PUBLICADO EN ATLÁNTICA XXII Nº 41, NOVIEMBRE DE 2015