La importancia de llamase Obama

Miguel Rojo/ Llevo viendo reproducíes estes palabres de Barak Obama en distintos medios cola persistencia d’una ardidura d’estómagu y tamién como exemplu de clarividencia política que (y esto recálquenlo toos cola mesma cafiante poca orixinalidá) enxamás se daría equí col nuesu presidente Rajoy o l’anterior, tamién tan nuesu (l’home que nun foi a llograr que se cumpliera aquello de qu’otros vendrán que me faigan bonu), o el que yá ta en puertes.

La fras de marres ye la siguiente: “Cuando reflexiono sobre’l mio papel de ciudadanu, más allá del fecho de ser presidente, y sobre los conocimientos que puedo apurrir a esa posición de ciudadanu, doime cuenta que les coses más importantes que deprendí na vida vienen de les noveles. Tien que ver cola empatía. Tien que ver cola noción de que’l mundu ye a esgaya enguedeyáu y ta enllén de grises, pero qu’inda hai verdaes que tienen que ser topaes, y que tenemos que trabayar por buscar. Y tien que ver cola noción de que ye posible conectar con dalgo o con dalguién, por mui estremáu que tea de nos”.

Ye verdá qu’Obama, col paso la lexislatura, ta perdiendo “la color” y del negru ta virando al descafeináu p’acabar, si nun tuviera que finar por llei’l so mandatu, nun sonrosáu paecíu al so antecesor demócrata na Casa Blanca… Dicir coses como que “el mundu ye a esgaya enguedeyáu y enllén de grises” o que ye posible llegar a algamar delles afinidaes seique electives con xente que se mueve per esferes distintes a les del nuesu pensamientu, nun me paez que seyen llogros d’un altor intelectual al que nun puedan llegar los presidentes d’esti cachu tierra llamáu España (tamién p’ardor del butiellu de más d’ún).

Agora bien, nel so discursu hai un pequeñu matiz, una palabra, una sola palabra que, como un puñaín de sal, una gota d’azulete, ye quien a da-y tastu y color a la so afirmación… La palabra ye “novela”.

Dicía Bertrand Russell que’l mundu sedría muncho más afayaízu si nun se dexara operar a naide en bolsa que nun pasara enantes un examen d’economía y poesía griega, y onde nengún políticu nun tuviese un fondu conocimientu d’Historia y de novela moderna… Dexando a un llau a los caimanes de la bolsa, paez evidente la nececesidá d’un conocimientu de la Historia (esa gran novela yá escrita y con interpretaciones tan diferentes que, delles veces, paecen obres distintes) pa cualquier políticu que quiera tener una noción axustada del momentu presente… ¿Pero por qué la novela y el so papel preponderante nel bagaxe cultural de los políticos, o inda más, como señala Obama, del ciudadanu d’a pie?

La novela, por riba cualquier otru xéneru lliterariu, ye capaz de facer una interpretación de la realidá, curiosamente, a partir d’unos personaxes de ficción y d’unes histories inventaes… Munches veces ensin que’l propiu autor seya mui consciente del importante papel que ta xugando. La lliteratura, xestada non como un meru entretenimientu, puede llegar a algamar un poder impredecible (más nel pasáu qu’agora mesmo, eso ye verdá) a mui curtiu plazu sobre’l pensamientu y l’actitú d’unos llectores qu’acabarán por esparder les sos idees al restu la sociedá. Pensemos, por exemplu, nun par d’obres bien estremaes en forma y fondu, y que me vienen agora a la cabeza: una, de tan evidente, nun necesita comentariu dalgún sobre’l so poder d’anticipación y toque d’atención, y toi falando de la novela 1984 d’Orwell; la otra, muncho más sutil y por tanto muncho más peligrosa, ye Madame Bovary y la so estrozante crítica a la sociedá burguesa del XIX, que fexo que’l llector (y mui especialmente les llectores) salieran de les sos páxines con una visión de la realidá na que taben enxertaos muncho más desasosegante a como entraron: de golpe, Flaubert, poniendo a la lluz lo tapecío de toa una sociedá hipócrita, dio-y carta de naturaleza y, polo mesmo, dotóla d’existencia. Yá lo dicía Millás cuando avisaba que yeren más peligrosos pal sistema los guajes que se quedaben en casa lleendo Madame Bovary, qu’aquellos que facíen botellón na cai…

Sedrá por eso que tolos Gobiernos autoritarios traten d’afogar, frente a la voz única y dogmática, la visión múltiple que da la novela y que fai una sociedá más llibre y crítica…

PUBLICADO EN ATLÁNTICA XXII Nº 42, ENERO DE 2016