L’Asturies terminal

Ignaciu Llope / Trenta y cinco años llargos d’Autonomía son yá un capítulu nos llibros que s’escriben -y, de xuru, s’escribirán- alredor de la hestoria contemporánea d’Asturies. Un capítulu que dará llugar a unos conteníos bien afayadizos pal llugar común; o dicho d’otra manera, un capítulu fácilmente haxográficu sobre la Transición y la construcción de la democracia nuna Asturies heroica na so llucha contra la dictadura -convién faer alcordanza de que’l franquismu foi una dictadura- y na que’l sistema de partíos resultante de la Transición reprodució dócilmente l’esquema estatal, un bipartidismu cuasi perfectu, harmónicu nun repartu de poder que ye mui senciellu aloyar dende los versículos de la estabilidá. Pero davezu les coses nun son tan sencielles, y lo que val pa los llibros de testu, yá nun val pa calistrar na complexidá d’un tiempu nel qu’esti país onde la tierra garra’l nome d’Asturies mutó estructuralmente.

Una mutación que non namás ye la constatación de que la vieya tradición industrial anguaño ye exactamente eso: una tradición más na mitoloxía moderna que la población caltién sobre sigo mesma. Y, con ella, una peculiaridá sindical única, imprescindible nel recitáu complaciente nesi sermón de la estabilidá enantes mentáu. Y ye que, si la fatigada organización sindical del país acabó tresformándose nun pegoyu acoroyáu del Réxime del 78, ello foi pola so eficaz adaptación a la decadencia -dicho sía en términos xenerales- d’Asturies. Porque’l fumu de les bien midíes y contaes barricaes nun ha d’envolubrar la evidencia del consensu sindical nel diseñu d’una sociedá ensimismada y acabada que nun ye quien a reconocese a sigo mesma como suxetu activu na hestoria. Pero sí como suxetu pasivu, siempre atendiendo a la posibilidá de nun tener que dedicase a l’aforfugante xera de pensar, de midir el futuru cola incertidume de tomar les propies decisiones: nun ye qu’inventen otros, non, meyor que decidan otros.

Asina, meyor prexubilar a esgaya que redefinir aquello tan primario d’afuracar la tierra pa sacar coses, dende la inversión en conocimientu. Meyor llantar faroles a preciu de llocántaru en Navidá que xenerar espacios, físicos ya informales, pa que les idees nun dean en devanéu. Meyor decidir que la dramática, terrible, perda demográfica ye una natural consecuencia de los ardores xuveniles por ver mundu, que’l fracasu colectivu d’una comunidá humana que nun ye quien nin a percibir l’arrecendor de la traxedia. El drama asturianu tien muncho que ver con la teatralidá d’una sociedá que namás ye quien a xenerar consensos p’algamar el record mundial d’escanciadores simultáneos de sidra: tou un exemplu de solidaridá colectiva.

Si nun s’albidra la necesaria multiplicidá de propuestes imprescindibles pa tornar una situación que conxuga’l futuru coles claves del presente ye porque eses propuestes impugnaríen los falsos consensos que lleldaron mentanto los últimos trenta años. Son consensos básicos y tresversales, pues informen mesmu’l disparatáu diseñu de les infraestructures asturianes -cumpliendo rigurosamente la llei que diz qu’a falta d’idees, meyor asfaltu y formigón-, que la estúpida fragmentación del campus universitariu asturianu, convirtiendo a la Universidá d’Uviéu nuna suerte d’edificios estraos per media Asturies, con azacanaos profesores y estudiantes mandando tiempu en dir como pita llueza d’un llau pa otru.

Consensos imposibles como esi ya antiguu que torgó y torgará la sobrevivencia de la llingua asturiana, pues la condición indispensable pal esanicie del milenariu idioma d’Asturies ye precisamente l’ausencia de reconociminetu institucional; pero, a la contra, l’axioma nun ye ciertu, pues la reconocencia institucional nun garantiza esa sobrevivencia, pa ello ye imprescindible un procesu de llealtá llingüística del que cadez mayoritariamente la población. Y que l’asturianismu modernu que surdió en 1974 nun foi quien nin a torgar nin a enunciar como discursu alternativu con mínima audiencia social.

Poro, el disensu que previsiblemente daría fuercia a la impugnación d’un modelu de ser y entender Asturies nun acudió a la so cita col presente. Y nun vieno porque’l suxetu social portador de talos discursos impugnadores emigró, coló, marchó, abandonó’l so compromisu necesariu pa la esperanza por incomparecencia. Pero la verdá ye que difícil sería qu’acontaciere d’otra manera, pues lo contrario abundaría na ficción d’una Asturies que nun esiste. Nin esistió.

PUBLICADO EN ATLÁNTICA XXII Nº 36, ENERO DE 2015