L’Asturies verde pistacho

Ignaciu Llope / Describía’l dibuxante Alfonso Zapico na so escelente obra Los Cuadernos d’Itaca dalgo que sal de güeyu en cuantes se trespasa la frontera con Francia; y ello ye la percepción del paisaxe, o meyor dicho, el contraste na construcción del paisaxe a entrambos los dos llaos de la llende. Dicía Zapico -el testu apoyaba los trazos cenciellos y elegantes del so dibuxu- qu’una característica de los franceses ye que cuando acolumbraben pa contra una casa vieya imaxinábenla remocicada, pintada, cola electricidá nuevo, con flores na antoxana y una fosa séptica nel xardín: imaxinaben una casa onde vivir; pola contra, en cuentes d’una casa vieya, un español vía una paliadora, un derribu total, una parcela edificable de 100 metros cuadraos y un edificiu d’apartamentos de cuatro pisos a noventa mil euros caún: víen un negociu que vender. L’inxeniu del hestorietista illustraba una realidá que tien n’Asturies delles de les sos más acabaes espresiones: y non solo la burbuya inmobiliaria y les sos consecuencies na devastación económica y social de los últimos siete años. Porque amás de ver un solar pa un negociu en forma mazacote de pisos, son les característiques estétiques -y étiques, qu’en non poques ocasiones ye trasuntu de lo mesmo- d’esi mazacote lo que termina por definir la forma qu’el paisaxe asturianu, mesmu urbanu que rural, vei alquiriendo nos últimos trenta años. Y ye que la devastación patrimonial qu’anguaño ye esi paisaxe y los elementos que lu constitúin nun vien de la destrucción d’edificios tres la Guerra Civil. Pola contra, vien de la combinación de la eficacia del franquismu, que foi quien a estrincar mentanto cuarenta años el valir del común como elementu vertebrador de les sociedaes desarticulando les redes comunitaries al empar que les ponía baxo’l Códigu Penal, y la so miserabilización de la vida cotidiana. Pero esa zafiedá de la dictadura nun finó cola desapaición física del dictador, porque a lo anterior xúntase una más que problemática rellación que caltién la sociedá asturiana cola so cultura. Esa rellación desplicaríase en términos de non-apreciu, d’un estrañamientu énte los elementos que son identificables como constituyentes de la identidá asturiana. Bien ye cierto que les identidaes ellabórense al traviés de discursos que-yos apurren xacíu, y que traducen los elementos vinientes de la cultura tradicional a un códigu cultu ya intelixible al lleelo dende la gramática de la modernidá.

La metamorfosis del texíu urbanu n’Asturies nun foi namás el crecimientu metastásicu de les ciudaes y villes del centru del país, sinón que tamién se basó na destrucción de los vieyos centros hestóricos y monumentales, o, lo que igual ye peor, la banalización d’esi patrimoniu. Pero nel rural asturianu, el procesu de cambiu nel que ta envolubráu de magar los años sesenta del sieglu XX, xeneró una suburbanización creciente, una xeneralización de modelos d’intervención caóticos que tienen como resultáu la destrucción cuasi irreversible d’esa construcción cultural que son los paisaxes. Un paisaxe espeya la representación social, identitaria y simbólica d’una realidá que foi inscribiendo na tierra al traviés del tiempu, de la hestoria, una única manera de ver y de tar nel mundu. Y qu’amás ye ún de los activos económicos más rentables qu’una sociedá ye quien a xestionar… si se sabe y quier xestionar. N’Asturies, anguaño, lo que queda ye un paisaxe que respuende bien a lo de “paraísu natural”, pues la humanización del mesmu supón ún de los fracasos colectivos más doliosos, y más invisibles de la hestoria recién del país. Un cromatismu disparatáu que fai de la sobria elegancia de l’arquitectura tradicional asturiana un insufrible catálogu de los colores más tóxicos: del verde pistacho al encarnáu parchís; y que n’ocasiones son imposición de los planes d’ordenación de dellos conceyos; volumetríes neoyorquines en parques naturales con tomos de llexislación enciclopédica, cochambre y basoria perdayures… A la fin, vein surdiendo perdayuri unes villes y pueblos d’una fealdá cuasi insoportable. Y la percepción de los habitantes del territoriu furnida dende’l non-apreciu y tamién dende l’autoodiu: como aquel paisanu qu’escoyó la ruina a la so cabana de teitu, refugando fasta subvenciones, con tal que nun sirviera d’adornu -como dicía- pa los turistes, o esi fenómenu tan rural y tan asturianu, que consiste n’iguar con criterios de parque temáticu la vieya casa los güelos como “apartamentu rural”, y siguir viviendo na destartalada casa de cementu, persiana blanca que son les catarates de los güeyos de les cases nos pueblos, y una bona mano de pintura verde pistacho.

PUBLICADO EN ATLÁNTICA XXII Nº 34, SEPTIEMBRE DE 2014