Felipe, Leticia y Sofía ya lleven tres años aguantando protestes y banderas republicanes el día de la entrega de los Premios Príncipe. La semeya ye del añu pasau.
Semeya / Alfredo Menéndez.

Les protestes, urriaes y xiblíos a los reis y a los convidaos ponen en dulda el supuestu apoyu popular del que gozaba la ceremonia y la mesma existencia del Principáu d’Asturies.

David Artime / Periodista.

Al escaparate de la Fundación Príncipe d’Asturies salió-y un rayón que va medrando al mesmu ritmu que’l que-y salió al escaparate de la Transición. Atrás queden n’Uviéu los desfiles de grandeza cortesanos y los súbditos esperando pa ver pasar una mano que saluda mecánica pela ventaniella d’un Mercedes de la Casa Real.

Agora hai que poner bien la oreya pa sentir los aplausos, porque los que participen na ceremonia empiecen sentir les urriaes, xiblíos, insultos y ‘puxes’ a la República según se van averando a la esquina de Santalucía.

La culpa tiénenla los aguafiestes. Empezaron a concentrase hai trés años, na Escandalera, una hora y media antes de la ceremonia de los Premios, convocaos pola estaya de la Corriente Sindical d’Izquierda (CSI) en Caxastur.

Nun foi un fechu puntual d’un añu puntual. La voz corrió como la pólvora. La ceremonia, en teoría tan querida y tan respetada por tolos asturianos según dicíen los medios, resultó nun ser nin tan querida nin tan respetada. Trés años dempués, la concentración paez ser yá una cita consolidada. Sigue convocando la CSI de Caxastur, pero naide nun tien claros los motivos. Republicanos, comunistes, anarquistes, nacionalistes asturianos, fartucos de la ‘casta’ o xente sin etiquetar… uníos por un sentimientu: el refugu a los estamentos de la vieya oligarquía que representen los Premios Príncipe, resumíu nuna única palabra: ‘Fartones’.

Folixa cortesana

Los grandes medios empéñense en siguir dibuxando un paraísu monárquicu y rosa, pero’l que pasó’l 24 d’ochobre per La Escandalera vio bien cuála ye la realidá. Pancartes n’asturianu y en castellanu, enseñes de milenta tierres y colores, camisetes reivindicatives y glayíos sobversivos sustituyeron a los polos de Lacoste, los uniformes de colexu priváu y los codazos por garrar la meyor perspectiva de Mariló Montero o la Reina Sofía.

La cita esti añu tenía amás carácter estatal, baxo’l lema ‘Somos Reales’, con autobuses veníos de dellos puntos del Estáu, especialmente d’Andalucía, pa coincidir n’Uviéu cola llegada de les Marches Pola Dignidá. L’anunciu de la movilización daba mieu y Delegación de Gobiernu llamó al Séptimu de Caballería: 400 antidisturbios desplazáronse a Asturies con uniformes de Robocop pa torgar unos incidentes que nunca asocedieron. Punxeron valles cortando la metá de la plaza, lo que valió una denuncia de CSI por vulneración del derechu de manifestación.

Y ente antidisturbios y gaiteros, colocaos arremente pa facer barrera sonora contra les protestes, fueron desfilando los participantes nos fastos. Unos más ríxidos, otros más sueltos, unos más serios, otros más risonderos, aguantaben los abucheos y desprecios. El presentador Luis del Olmo; l’alcalde d’Uviéu, Agustín Iglesias Caunedo; el so conceyal condenáu por revelación de secretos, Jaime Reinares; l’ex ministru Josep Piqué; el líder de Ciutadans, Albert Rivera… Algún nun disimuló la curiosidá énte les protestes y quedó paráu en mediu la calzada acusbiando l’espectáculu. Pocos se dieron cuenta de quién yera: el periodista y tertulianu Fernando Jáuregui. Munchos yá taben dientro aforrándose’l marrón, como la vicepresidenta del Gobiernu central, Soraya Sáenz de Santamaría, o’l presidente d’Asturies, Javier Fernández.

A lo último pasa’l coche de los reis y llega’l puntu cimeru de la xiblada. Dempués unos queden, otros marchen y otros saquen conclusiones y falen de “confluencia política”, como l’ex sindicalista Cándido González Carnero; el líder del Sindicatu Andaluz de Trabayadores, Diego Cañamero; o la eurodiputada de Podemos Tania González. Son los otros famosos, los del llau escuru.

Con confluencia o ensin ella, lo cierto ye que los concentraos llograron otru añu facer más ruiu que la Fundación. Y con esi ruiu va tener que boriar a partir de 2015 Leonor de Borbón, cuando los Premios pasen a ser de la Princesa d’Asturies. Meyor que-y lo vayan esplicando yá a la neña pa que sepa lo qu’hai. Y dempués qu’ella decida. Si nun-y presta, siempre tendrá alternatives. Que-y pregunten al so taragüelu, Alfonso XIII. Ye que lo que tienen los cambios de réxime.

Una escena de les protestes d’esti añu. Semeya / Pablo Lorenzana.

Príncipe de las Astucias

Los del Campoamor nun fueron los únicos Premios que s’entregaron esa selmana. Un día antes otorgárose los de la Fundición Príncipe de las Astucias, qu’empezó hai cuatro años con esta ironía teatral na Plaza de La Escandalera, de forma paralela a la ceremonia, nos tiempos nos que tovía nun había movilizaciones.

Esti añu foi na Corredoria Arena (Uviéu) y, ente otros galardonaos, tuvieron Alberto Ruiz Gallardón (Premiu de los Deportes), José Ángel Fernández Villa (Premiu de les Artes) o’l conseyeru de Sanidá madrilanu, Javier Rodríguez (Premiu d’Investigación Científica), anque recoyó’l premiu nel so nome’l ‘virus del ébola’.

La gala alternativa fizo rir al respetable, munchu menos numberosu que nel actu seriu que la precedió, y qu’acabó tornando nun mitín de cinco partíos: Juan Carlos Monedero (Podemos), Sabin Cuadra (Amaiur), Juantxo López de Uralde (Equo), Lara Hernández (Izquierda Unida) y Celia Mayer (Ganemos Madrid) ofrecieron caún la so retafila de crítica social y política, y llamaos a la movilización y a la construcción de mayoríes. Como broche final, Diego Cañamero tomó la palabra pa facer una incendiaria llectura de la situación.

Sobraron aplausos y emociones y faltaron propuestes, busca de puntos en común, intervenciones del públicu y alusiones a la movilización del día siguiente. Cuando acabó Cañamero yeren casi les diez de la nueche. Tovía quedaba la gala de la Fundición y la xente tenía que madrugar. Pal añu qu’entra igual deberíen escoyer facer más comedia a costa de la política y menos política a costa de la comedia.

PUBLICADO EN ATLÁNTICA XXII Nº 35, NOVIEMBRE DE 2014