Quique Faes: Bergoglio, llistu como un artu

Tarrecer que llegue una guerra nun equival a ser un militante pacifista, del mesmu mou que quedar en casa en cuenta de salir a matar críos nos parques públicos tampoco ye garantía d’amor pola infancia. Casi too almite graos: por eso podrá dicise que Jorge Bergoglio nun ye un ultramontanu, pero nunca insinuar que ye un progresista. Taben más cerca’l términu, por citar una riestra de compatriotes que vienen al casu, l’obispu Enrique Angelelli (al qu’un coche fulminó en 1976 por mirar por demás polos drechos humanos), los cures Gabriel Longueville y Carlos de Dios Murias (asesinaos por idéntiques razones), los cinco relixosos palotinos a los qu’esi mesmu añu acribillaron a espetaperru na so parroquia’l norte de Buenos Aires, o mesmo les monxes Léonie Duquet y Alice Domon, quien, na so condición fatal de palombes qu’esnalopien por error nun concursu de tiru al platu, tuvieron qu’arrecostinar amás con una violación previa a la muerte. Y nun ye que’l martiriu fuera la única sienda hacia la virtú naquella Arxentina atroz d’ente 1976 y 1983; ye la omisión énte tanta baxez lo que rescampla.

Rincha, poro, qu’una campaña de propaganda tan precoz como fabulosa quiera facer agora de Bergoglio casi un cura tercermundista pa ilustrar una supuesta revolución dientro la Ilesia que con suerte nun va pasar de ser -perdón pol pesimismu- una revolución estética. Otro ye que, depués de tener que tragar con un polacu recalcitrante y de ver caer al so sucesor alemán por motivos que poco o nada tienen que ver coles altures del espíritu, esti xesuita arxentín llistu como un artu y tamién como munchos de la so escuela, esti Bergoglio, digo, proceda d’unes coordenaes ideolóxiques más tebies y, sobre manera, que tenga esi ardiz qu’hai tiempu paez tener pa manexar los símbolos y comunicar con ellos lo que se-y antoxa.

Pero, cuciu como ye, caería yá na cuenta que nun ye l’únicu que quier facelo. Y sabrá qu’al otru día de salir al corredor na plaza de San Pedru p’arengar a una lexón de groupies, otru grupu d’ellos presentáronse cola banderina’l Vaticanu prendida na solapa pa esplica-y al xuez en qué midida colaboraron cola dictadura d’otru Jorge, Videla. Quier dicir que nel universu mental d’estos enterradores vocacionales l’alianza ente lo más cavernícola del Exércitu y lo más escuro de la Ilesia tovía ta vixente. Quier dicir tamién que les coses son, en cierta manera, como s’espeyen en quien les percibe. Y evidencia les servidumes que tovía va vaga-y arrastrar a la Ilesia arxentina pola mor del comportamientu de la gran mayoría de los sos dirixentes.

Flash-back. Nació Bergoglio nuna ciudá con 25.000 prostitutes clandestines, atoxigaes al empar pola prohibición llegal de la so actividá y pola esplotación de parte de la mesma elite bienpensante que dicía apludir la norma. Andaría polos venti años, Jorge Mario, cuando’l Vaticanu s’asoció al Departamentu d’Estáu norteamericanu -esi nial de filantropía- pa crear una xenuina democracia cristiana arxentina cola que sofrenar el supuestu avance’l comunismu nel país. Nun debía andar pela plaza de Mayu el día qu’un escuadrón d’aviones la bombardeó, matando a más de 350 civiles qu’amás yeren compatriotes. Llevaben pintaes alusiones a la conseña “Cristo vence”, y queríen castigar al presidente Juan Perón, que tuvo qu’escapar poco depués pal exiliu llevando con él un retratu de la Virxen de Luján pola mor d’un nuevu güelpe d’Estáu qu’arrancó al gritu de “Dios ye xustu”. Porque tamién yera católicu, Perón, pero calculó mal el so enfrentamientu final con una de les Ilesies más reaccionaries del mundu. Del 76 al 83, qué se pue contar. L’episcopáu arxentín acompañó en xeneral a la dictadura militar “con comprensión, al so tiempu tamién con adhesión y aceptación” porque al fin y al cabu nun taba mal barrer el país de marxistes. Y pa cuando estos casi nun quedaron, tocó siguir erre qu’erre cola moralización. Depués qu’un cardenal proclamara que’l divorciu envereda pa “la creciente drogadicción y la delincuencia precoz” (yera 1986), l’arzobispu Antonio Quarracino propuso (en serio) enzarrar a tolos homosexuales nun guetu. Bergoglio -que ser nun ye un ultra pero sí un gran conservador, repito- tamién ve na homosexualidá la mano de Satanás. Exercer el bien n’esclusiva ye lo que tien, qu’ún monopoliza tamién el mal y entós el negociu ye redondu. Lo demás son matices, símbolos, xestos.

PUBLICADO EN ATLÁNTICA XXII Nº 26, MAYO DE 2013.