Referéndum o negociación, pero non diálogu

Diálogu y referéndum son dos conceutos que s’escluyen. Semeya / Carolina Santos.

Nicolas Bardio / Politólogu.

Nes últimes selmanes de crisis creciente ente’l Gobiernu de Cataluña y el del Estáu español (dambos sofitaos nuna mayoría parllamentaria nun y n’otru Parllamentu) vien sintiéndose la idea de la necesidá de falar. Col nome de «Hablemos, Parlem, Falemos» llanzóse la iniciativa que buscaba favorecer la esistencia de pontes de comunicación y diálogu ente dambos llaos. Y delles places enllenárense de blanco pa sofitar la vía al diálogu y, tamién, a un referéndum pautáu ente la Generalitat y l’Estáu.

De mano pue paecer que nun ye llamativo, pero nun dexa de selo’l sofitar l’apueste por un referendum y, al empar, pol diálogu. Referéndum y diálogu son dos conceutos que s’escluyen l’ún a l’otru. Nun pue haber diálogu si hai referendum, nin pue haber referéndum si hai diálogu. En realidá, pue haber les dos coses, pero nun se puen dar nel tiempu de forma simultánea.

El referéndum ye lo que los franceses llamaríen «trancher»; atayar, cortar pelo sano ente dos posiciones irreconciliables. O se ye una Comunidá Autónoma o se ye una República independiente, nun hai medies tintes, nun hai espaciu intermediu, nun hai gris, nun hai negociación dala. El referéndum pue ser, asina, una forma de sancionar un diálogu como pue ser el referéndum constitucional de 1978, nel que la inmensa mayoría de fuercies polítiques (práuticamentes toes sacantes el PP) pidieren el refrendu (la etimoloxía con referéndum nun ye baladí) de los representaos a una decisión dialogada y pautada polos representantes.

Sicasí, nun paez que nel alderique actual alredor del famosu «encaxe» de Cataluña n’España heba espaciu pa un referéndum que «refrende» sinón más bien pa ún qu’ataye. Lo que convierte la propuesta de diálogu en superflua.

De la que falamos de diálogu, hai tamién qu’analizar un elementu cimeru de tol enguedeyu políticu nel que tamos, esto ye: ¿a quién-y interesa’l diálogu? Hai xente que s’enfota na bona fe de los actores políticos y que «creyen nel diálogu». Personalmente teo una visión más pesimista de la política y cuido que nun hai voluntá de diálogu cuando podemos resolver pela fuercia una situación ensin tener que ponenos a dialogar. Quier dialogar Junts Pel Sí porque la uniteralidá ye dañible pa los sos intereses de clase en munches coses (fuga d’empreses, reconocimientu internacional…), nun quier dialogar la CUP porque la so posición de partida ta tan alloñada de les posiciones polítiques y económiques del Gobiernu del PP que tienen muncho más que perder que que ganar. Quier dialogar Podemos porque-y interesa caltener a Cataluña n’España contenta, porque 1 de cada 5 votos de Podemos sal d’ehí, y porque ta aprovechando la situación p’asitiase como la fuercia de diálogu y de sentíu d’Estáu (lo que los catalanes llamen ‘seny’). Nun precisa’l PP de dialogar porque Cataluña nun tien nada que’l PP quiera, nin hai perspeutiva dala pal PP de ganar fuercia ehí, al contrario, les muestres de fortaleza policiales y militares son pal PP una manera de ganar votos y de reforzase… Va poco, Rajoy advirtió al PSOE de que si nun taben detrás d’él, diba a eleiciones, ensin nengún tipu de mieu.

Poro, la primer entruga qu’hai que facese ye: ¿val más negociar o val más votar? Esto ye: ¿hai marxe pa llegar a un alcuerdu y hai voluntá d’alcuerdu? ¿Quieren los independentistes asumir una posición distinta de la independencia -por exemplu un Estáu Llibre Asociáu como ye Puerto Rico o como pidiere Ibarretxe pa Euskadi va dellos años-? ¿Tien el PP marxe p’aceutar da-y más poder a les Autonomíes? ¿Pa federalizar España? Y si se fai asina… ¿nun taríemos «mercando soga» y simplemente posponiendo una crisis que ye inevitable?

La reconfiguración del Estáu español, si se quier a Cataluña dientro, tendría que pasar per una serie de coses, como sedríen, por exemplu, finar cola obligatoriedá de la llingua castellana, crear un Estáu federal nel que nun heba llingües, pueblos o ciudaes de primera, de segunda o de tercera… Acabar, en definitiva, col madrileñismu que ta perdayuri (nes tertulies de les teles, na manera en que se fai l’AVE, na manera na que s’informa de lo que fai Carmena y non de lo que faen otros alcaldes…). Habría que reconfigurar España plantegándose coses que mos paecen increyíbles pero que sedríen la única manera de facer un proyeutu que nun seya colonial nin güela a naftalina, sinón que seya abiertu. Habría que camudar l’himnu, la bandera, quiciabes hasta la capital y, por supuesto, habría que finar col adoctrinamientu a los guah.es nes escueles o la manipulación mediática, porque nun ye de recibo qu’un guah.e de Castiella nun estudie nin una canción en catalán, nin sienta nunca falar asturianu o sepia dicir el nome de dos escritores en gallegu.

Por desgracia, esti horizonte n’España nun ye válidu nin deseable pa la mayoría de los partíos nin de les posiciones polítiques poro, sí, habrá referéndum, de xuru… pero non, nun habrá diálogu. España nun tien ganes nengunes de deconstruyise y de facese d’otra manera que nun seya enriba los posos del nacional-catolicismu y porque al final Castiella nun ye tan «ancha» como diz el refrán…