Selfie tapir

Pablo X. Suárez / Too ye tan neo o retro o post nestos tiempos que cuesta dar cola pallabra exacta pa cada aspectu del presente ensin recurrir a prefixos que suenen cool, anglicismos molones como’l susodichu. Quien dea con elles, yá la tien ganada. La neollingua tien en contra qu’acaba repitiéndose, rollu hipster, hipster, hipster, hipster, nesi plan. Por eso siempre compite coles vieyes metáfores. Elles son dures como la peña, y tán escrites recio nel granitu de la historia. Y ye qu’al final la rosa que pincha y la fueya otoñal a la que valtia l’aire yá taben ehí, la sangre que causaba la espina tenía’l mesmu color y una temperatura paecida aquella seronda. Sabíalo Ovidio (digo un romanu por dicir ún) y cuento que lo creo yo. La neollingua, que cada día ye más vaga pero s’apega como’l mofu, falaría de neorosa y neoseronda. Sicasí, esti procedimientu nun pue repetise hasta l’infinitu: diba ser poco elegante falar de neoneorosa o neoneofueya, anque ta’l que piensa qu’un neoretroseronda lo diba a petar. La neollingua podría acudir, si acasu, al caxón de sastre de lo hipster. Y dalgún fatu podría, en cualesquier circunstancia, subir un selfie a sabe dios qué rede social. Si la neollingua abusa del términu hasta escosalu de sentíu, casu hipster (pensáilo en plan repitamos hipster, hipster, hipster, anque sabemos que s’agota, queden polo menos diez años pa que pudiéramos falar de neohipster y nun se nos vien a la cabeza otra, hipster, hipster), pue ser tamién que, cuando s’asocia a acciones medianamente discernibles na confusión d’anguaño, nos diga dalgo de nosotros mesmos. Selfie pinta bien en cuantes a capacidá de defininos, pero ye imposible que furrule amañoso si nun sabemos qué retratamos cuando nos facemos el semeyu, y tan solo decidimos la cara de mamíferu tuntu que nos sienta meyor.

Deberíemos enfocar alredor: ye raro qu’un selfie nos capte les contradicciones, yá qu’elles tan ehí fuera, aguardándonos, abriendo la so bocona fea de mamíferu rival. Y necesitamos la semeya del mamíferu rival. Emparanoiar con que nel últimu selfie, esi que yá nun vas poder ver, salga’l mamíferu rival atacándote pela espalda. El palín pa suxetar la cámara (¡existe!) ye neorrealidá incrustada, pero tampoco una señal d’apocalipsis. Siguimos retratándonos ensin pensanos gran cosa. Arde Xixón, na selmana de les primeres truenes de xunu. Aspiro’l fumu cola mio pequeña trompa de tapir, golifio bien l’arume. Podía subir al picu’l Sol (yá subí nuna ocasión a echar un polvu) dende’l que se ve bien guapo la ciudá, y preguntame si les metáfores de verdá quemen. Facer un selfie de cume, colos fueos detrás, la mio pequeña trompa de tapir esfocicando. La verdá ta nel neopaisaxe. ¿D’au vienen estos fumos? ¿Habrá colegas calcinaos? ¿Sonó daveres un crack, o soi yo o Nacho Vegas? ¿Vienen d’allá les interferencies? ¿Ye l’aparatu?

Pero non, paso de subir un monte güei, dame galbana. Fadré una simple autofoto equí, na plaza Les Campes, col fondu de davezu. La vieya metáfora ye donda y adaptable y tampoco nun dexamos, dacuando, de ser Narciso, y Narciso nunca nun tuvo nin puta idea de nada, y ello ye que, de fechu, tracamundió los ecos coles voces, l’amor propiu col altruista. Tendríemos qu’enfocar alredor. Somos fíos del aburrimientu, educáronnos nos vieyos términos, vacíos a fuerza de repetición. Tócanos enllenalos nuevamente de xacíu o reventalos y crear vocabulariu nuevu. Y siempre ye ceo, corremos detrás de la perspectiva histórica ensin ser nunca quien p’algamala, y sabe dios cuántes veces habremos de contradicinos enantes de dar cola pallabra. A la espera de nuevos acontecimientos, quédome cola mio condición tapir, la única verdadera, xugando a los bolos cola posibilidá d’estinción de la mio castra, espectante na mio condición d’herbívoru, rumiando’l presente, pasándolo bien, cuando se puede, na mio animalidá alternativa. Apuesto por un zoo decente pa toa esta fauna contemporánea, y porque nunca, en nengún casu, los que se dicen mamíferos nos salgan rana. O mamones.

PUBLICADO EN ATLÁNTICA XXII Nº 39, JULIO DE 2015