Damián Barreiro publica «Yo, la to llingua»

Imaxen del llibru, d’Ediciones Trabe.

Damián Barreiro, periodista y collaborador d’ATLÁNTICA XXII, acaba de publicar Yo, la to llingua, un ensayu onde l’idioma asturianu cuenta, en primer persona, la so historia. Trátase d’un llibru d’Ediciones Trabe dirixíu a neños a partir d’ocho años onde tienen especial protagonismu les imaxes, que quieren tresmitir a la rapazada dellos símbolos iconográficos que forxaron la identidá asturiana a lo llargo de la historia. Otra manera, Yo, la to llingua tamién afala a les xeneraciones nueves nel ciñu y l’amor por l’asturianu, porque, como s’esplica nesta obra, van ser los asturianos y asturianes los que decidan cuál va ser el futuru del so idioma.

L’autor, depués de pasar poles redacciones d’Asturies.com y Les Noticies, collaboró con otros medios, como la Televisión Local de Xixón, el periódicu Diagonal Asturies o’l diariu La Nueva España, na so sección «Escolinos». Actualmente collabora con ATLÁNTICA XXII. Amás, nel añu 2013 ganó’l Premiu Fierro Botas con L’espeyu onde miranos: televisiones de proximidá n’Europa Occidental y procesos de recuperación identitaria. Un añu depués recibió’l Fuertes Acevedo con Caleya Sésamu: el papel de la televisión na tresmisión interxeneracional d’una llingua. Tamién foi merecedor del Premiu d’Investigación Sociollingüística qu’entama l’Academia de la Llingua.