Slider
David Castañón: «Va 11 años yéramos unos pioneros, agora les páxines web tan pasaes de moda»
Published on
David Castañón
Diz David Castañón, ceador y alma del blogue (y llibru) Les Fartures que los asturianos «tenemos a la nuesa disposición producto d’escelente calidá n’ún de los llugares más idilicos del mundu». Y tamos convencíos de que tien razón, porque pocos conocen como él los fogones de la nuesa tierra. El domingu vamos esfrutar de la so compañía en Manglar (calle Martínez Vigil, 14, Uviéu) nel arranque de «La otra Asturias», una serie d’alcuentros entamaos por Atlántica XXII. Esta primer sesión va tar centrada en dalgunos de los proyectos dixitales más importantes de la rexón y va cuntar tamién con El Soma y Al Platu Vendrás. Estais toos convidaos a venir tomar el vermú con nós dende les 12.30 hores.
¿Cómo entamó Les Fartures?
Les Fartures entamó va 11 años. Empezamos fai 10 años un compañeru de trabayu –Jorge Santos–, y yo aconseyándonos sitios onde dir a comer per Asturies, nuna fueya de papel. Y como trabayamos nuna empresa d’informática, darréu surdió la idega de centralizalu too nun sitio que pudiéramos consultar. Daquella malapenes había wifis, nin internet, nin preseos móviles, asina que llevaba una versión offline descargada. Al pocu dímonmos cuenta qu’entraba xente a lleenos, y decidimos acuriosalu y cuidar el diseñu. Pocu a pocu hasta va unos años que siguí yo solu col proyeutu.
¿Cómo se vive de pucheru en pucheru?
Hai muncho más trabayu de lo que la xente cree, pero esfrutando muncho con ello. Préstame cuidar muncho les semeyes, amás de tolo qu’escribo. Güei cúcase too con muncho más tientu y con tola xente que llee Les Fartures, cualesquier fallu ta más miráu. L’oxetivu ye esfrutar colo que faigo, y amás poner un granín p’axudar a los productos asturianos y la xente que tira per ellos, dar a conocer esa Asturies mui desconocida pa tolos asturianos y dignificar la nuesa cultura, la gastronómica tamién. Y too esto ganando quilos, eso sí, del colesterol bien, gracies.
¿Cómo se combina la presencia dixital cola editorial? ¿Tien el mesmu públicu n’internet que nes llibreríes?
L’apueste de Delallama Editorial foi fuerte, 10 años escribiendo nun blogue dixital y va a proponeme facer un llibru pa que tea presente en toles llibreríes. Casique tuvieron que convenceme ellos a mí. Y la verdá ye que tamos encantaos, ta vendiendose perbien, y a la xente ta prestando-y. Y ya me cuntaron qu’hai unos cuantos que van col llibru embaxu’l brazu, de restorán en restorán, probando ún a ún. La verdá ye que ye un arguyu. El públicu ye’l mesmu, paezme una bona amusa de que los dos medios son compatibles y necesarios. El dixital apurre l’accesibilidá y la cercanía. Ya’l llibru tien dalgo intanxible que lo dixital enxamás tendrá. Presta ver nes presentaciones del llibru a muncha xente que lleva lleendo Les Fartures munchos años, que siempres comenten y participen, y que fueron los primeros en dir a mercar el llibru, y que pa encima, tan encantaos con él.
¿Tien la nuesa gastronomía tantu nivel como creemos los asturianos?
L’asturiana ye una gastronomía impresionante. Tenemos a la nuesa disposición productos d’escelente calidá n’ún de los llugares más idílicos del mundu. En pocos paises hai tanta variedá nun llugar tan pequenu. El Cantábricu con unos pexes y mariscos increíbles; la gran variedá de races autóctones de carne; una güerta enorme, base de platos únicos ya imaxinativos en tiempos difíciles; una mancha quesera envidiada en tol mundu; una bebida ancestral, con una ellaboración y forma de consumila única, unos vinos qu’amiesten Asturies col Atlánticu ya incluso una cerveza artesano con gran reconocimientu. Somos unos privilexaos. Pienso qu’un de los problemes que tenemos ye que los propios asturianos nun creemos nel nivel que tien la nuesa gastronomía, esi autodiu tan asturianu fainos pensar que lo de fora siempres ye meyor y que lo nuesu ye de pior calidá, cuando nel restu’l mundiu tan naguando polo que nós ufrimos. Ye casi sociopáticu y pa estudiar. Pasa cola gastronomía, pasa cola llingua, pasa cola política …
¿Cree que va llegar el momentu nel que la fiebre pola comida abandone internet?
Instagram va acabar coles nueses vides (ríe). Pienso que la comida va dir tovía a más n’internet, y la gastronomía nun ye namás una moda que vien pa quedase. Cuando nós entamamos a falar de gastronomía va 11 años con un formatu nuevu, que yeren los blogs, yéramos unos pioneros; y agora casi hasta les paxines web tan pasaes de moda. A la fin, lo qu’importan ye lo que cuntes y lo de menos onde; y la comida, ya sía más tradicional o más moderno, va tar siempre presente na nuesa vida, y polo tanto, nos sitios onde teamos presentes, internet ún d’ellos. Y sí, yo soi de los que faen venti semeyes enantes de ponese a comer, pero nun ye por mí, ¿eh?, ye pa cuntávoslo dempués (guiñu, guiñu).
También te puede interesar:
- Franco y los adolescentes asturianos
- Y al final, ¿Gabino libró?
- “Hay que levantar cuanto antes un frente independentista en Euskal Herria”
Os recordamos que también podéis seguirnos en:
Facebook: facebook.com/AtlanticaXXII/
Twitter: twitter.com/AtlanticaXXII
Telegram: t.me/atlanticaxxii
Instagram: instagram.com/atlanticaxxii
Y suscribiros a la edición en papel a través del teléfono (637259964 o 984109610) o el correo (letrasatlanticas@gmail.com)
You must be logged in to post a comment Login