L’asturianu, ¿camín del desaniciu o a aldu de la recuperación?

Una clase de llingua asturiana, una asignatura optativa. Semeya / Iván Martínez

L’Asociación de Trabayadores de la Normalización Llingüística destaca que “la sociedá va per delantre de la clas política” no tocante a la oficialidá y reclama “un reglamentu pol que se mande”

Redacción

@AtlánticaXXII

Depende. Podíemos tar énte la recuperación del idioma. Pero tamién nel camín que lleva al so desaniciu definitivu. Según la perspeutiva y, tamién, según la voluntá y l’actitú de quien analice la situación actual del asturianu y del gallego-asturianu. “Si garramos un ramal topamos un idioma residual, con una perda de falantes, de vocabulariu, un idioma más probe y con poques posibilidaes de revertir la situación pela qu’altraviesa”, defende Penélope Miranda, de L’Asociación de Trabayadores de la Normalización Llingüística.

Afita, sicasí, que na otra cara de la moneda ábrese “un camín onde tenemos una oportunidá de facer un idioma fuerte, de recuperar la dignidá llingüística, de trabayar la tresmisión ente xeneraciones, de da-y entidá alministrativa, tan necesaria na normalización”. Y p’algamar esi oxetivu la vía ta clara: “El trabayu de normalización nun contestu d’oficialidá”.

D’esta miente, la oficialidá ha dir acompañada d’un “reglamentu pol que se mande” en ficies de que nun se dea la discriminación llingüística, que n’Asturies ye “constante”. Penélope Miranda pon como exemplu “qu’un neñu o una neña nun pueda desenvolver el so futuru y la so vida n’asturianu o gallego-asturianu, coles mesmes oportunidaes que si lo quixera facer en castellanu”. Amás, l’accesu d’estos idiomes a la programación cultural o televisiva ye mínima y la so presencia nel espaciu públicu mui baxa, arrequexando l’asturianu y el gallego-asturianu al ámbitu familiar.

La oficialidá ha dir acompañada d’un “reglamentu pol que se mande” en ficies de que nun se dea la discriminación llingüística, que n’Asturies ye “constante”

“Por eso una llei de normalización que desenvuelva la oficialidá habría de da-y la vuelta a situaciones como estes pa garantizar qu’esos neños y neñes tengan la llibertá, qu’agora nun tienen, porque-yos daría’l reconocimientu de los sos derechos llingüísticos”, apunten dende l’Asociación de Trabayadores de la Normalización Llingüística.

Pero primero había llograr un alcuerdu políticu pa modificar l’Estatutu d’Autonomía na Xunta Xeneral del Principáu. Un llabor complicáu dada la oposición de dellos grupos, frontal nel casu del PP, y que torga consensos. “La sociedá va per delantre de la clase política nesto como n’otres cuestiones que nos afecten el día a día”, comenta Penélope Miranda que rescampla que “la sociedá vive la cuestión llingüística dende la normalidá”.

L’Asociación de Trabayadores de la Normalización Llingüística sorraya tamién la importancia de crear un texíu social que valore l’idioma y la toponimia asturiana, que pueda consumir cultura n’asturianu y que lu valide al traviés de la investigación o l’arte como opción de futuru. Garrar el camín de la recuperación de la llingua y preparala pa que pueda emplegase con garantía nel espaciu públicu y nel mesmu contestu de normalidá que la usen munches families asturianes: “Oficialidá con planificación, esa ye la clave”.

Os recordamos que también podéis seguirnos en: 
Facebook: facebook.com/AtlanticaXXII/
Twitter: twitter.com/AtlanticaXXII
Telegram: t.me/atlanticaxxii
Instagram: instagram.com/atlanticaxxii

Y suscribiros a la edición en papel a través del teléfono (637259964 o 984109610) o el correo letrasatlanticas@gmail.com