Casa Narciso, arguyu teberganu

Casa Narciso de Teberga. Semeya / Fernando Luis Gómez.

INSTITUTU ASTURIANU DEL CHIGRE (2)

Testu José Alberto Álvarez

Pa mí, un chigre ye de verdá chigre chigre cuando me siento como en casa. Préstenme especialmente los que quieren paecese a cocines antigües. Y esta ayalga llamada Casa Narciso tien pa mí ambiente de llar. Evoca esa parte más doméstica de la nuestra cultura y la nuestra historia. Pa mí, como teberganu exiliáu al que-y cuesta pronunciar la l.le vaqueira, Casa Narciso ye como volver a mio patria, a esa romántica casa de cuentos al llau de la chapa caliente onde s’escuchen les histories de los mayores, de la guerra, de los señores Don Tal, a les xeres del campu y les histories de la braña.

Casa Narciso, en San Martín, yera onde mio pá pagaba los pelleyos de vinu arramplaos de Torrestío que mio güelu llevaba na bota pa la mina, esa a la que llueu llamaríen Hullasa. Cada vez qu’apaecía pol chigre a pagalos dáben-y chocolate y hasta una Coca-Cola un día, pero aquella bebida yera tan rara que nun acababa d’entender a qué venía tantu borboyu y tiróla embaxo la barra, echando grandes cagamentos y acusando al chigreru de da-y dalgo revenío. Ellí garró tamién un teléfonu por primer vez, a lo Lina Morgan, porque daquella, nos años sesenta, nun llegaba a les aldees; tampoco la televisión, y munches veces nin siquiera la carretera. Yera la época de los grandes cambios nel campu asturiano.

En Casa Narciso tamién ye onde paraben nes feries buenes los vaqueiros de Somiéu con aquelles empanaes que metíen mieu. Dempués dormíen onde podíen y al otru día salíen a pie, pelos montes, de vuelta pa casa.

De xuru qu’hai munchos chigres vieyos n’Asturies, pero non tantos conserven tan bien la esencia y l’arguyu de lo que siguen siendo. Sin malpenes reformes. Nun llegó el fluorescente, pero sí la tele de plasma. Nun se puede tener too.

Ye’l so suelu de lladriyu macizo; los llargueros de mesa, de castañal y piedra de mármol colos sos bancos comunales y los sofitos de madera. La cocina de lleña, tizando n’inviernu; el bañu fuera, y una terraza bien prestosa en branu.

A los sos 150 años, como mínimu, Casa Narciso sigue siendo un clásicu en Teberga. Nacho ta dende nun hai munchu al frente de la intendencia y Adela de cara al públicu. Garren el relevu dempués de que se xubilaren los sos anteriores dueños. Ellos traten de caltener tolo bien fecho hasta agora, como les tapes domingueres de torreznos de cerdo, porque en Casa Narciso fálase asturiano, pero’l platu más popular pídese en castellano, “porque siempre fue un poco pijo”, dicen ensin malicia dalgunos de sos veceros. A la carta fueron añadiéndose más tapes, y tampoco nun falten xornaes gastronómiques como la de les setes, pa la seronda.

Muncha suerte nesti apueste por conservar esti muséu vivu de la nuestra cultura y que, como Asturies mesma, necesita reinventase ensin perder la autenticidá.

PUBLICADO EN ATLÁNTICA XXII Nº 47, NOVIEMBRE DE 2016