Diálogu del aire

Miki López.

Artículu publicáu na edición de papel del númberu 61 d’Atlántica XXII

Pablo Texón | Escritor, profesor y traductor.

@PabloTexon

—Mami, quería preguntate una cosina.
—¿Qué quies, vida? Dime.
—Pues lo que yo quería saber… polo que yo te quería entrugar ye… ¿por qué falamos asturianu?
—¡Puuuf!, nun sé, mante, nun ye un asuntu que me lleve xera. Qué sé yo, fía, supongo que falamos asturianu porque to güela falaba asturianu y la madre de to güela falaba asturianu y la güela de to güela tamién falaba asturianu. Por eso, digo yo que la pregunta tien que ser: «¿Por qué nun díbemos falar asturianu?».
—Quies dicir que ye normal falar asturianu.
—Sí. Que ye natural. Pa nosotres, a lo menos, yelo.
—Entós, dime, mami, ¿por qué hai muncha xente que nun lo fala?
—Eso ye una cosa que tienes que pregunta-yos a ellos, non a mi.
—Van dicir, seguro, que nun saben falalo.
—Mira, esi argumentu sí que ye de pesu. De toles maneres, que nun conozan l’asturianu nun significa que nosotres nun lo conozamos y nun lo usemos. Igual que que nosotres lo falemos nun significa qu’ellos tengan que lo falar.
—Yá, pero nun ye too tan guapino como dices y hai sitios onde nun se pue usar y les clases nun son n’asturianu y la tele nun ye n’asturianu.
—Por eso hai persones que quieren que sía oficial: pa que pueas usalo onde y cuando quieras.
—Y, si ye oficial, ¿tol mundu n’Asturies va tener que falar asturianu?
—Por supuesto que non, cielu. Caún va falar lo que-y pete, lo que-y preste o lo que-y salga. Faltaría más. Tu mesma podríes decidir falar en castellanu el restu de la to vida. Eso sí, si lo que quixeras fora falar n’asturianu, dibes poder facelo en cualquier ámbitu. Yo creo que ye bien cenciello.
—Tu dices que ye cenciello, pero yo nun te creo.
—A ti lo que te pasa ye que yes mui mala y nunca crees lo que diz to madre, que, al final, siempre acierta, ḥa, ḥa, ḥa, ḥa.
—Nun te burlles de mi y sigui esplicándome.
—Ai, tiénesme apolmonada con tanta entruga, cosina. A ver, dime.
—Pues cuéntame por qué hai xente que ta en contra del asturianu. ¿Por qué, mami?
—Eso que dices paezme a mi que ta mal plantiao: nun se pue tar a favor o en contra del asturianu, igual que nun se pue tar a favor o en contra del aire. ¿Conoces a daquién que refugue la existencia del aire? A que non… Pues lo mesmo col nuestru idioma: existe. Y unos quieren facer con él unes coses y otros, otres. Neso —en qué se fai con ello— sí se pue entrar a opinar. Pues querer que sobreviva o que desapaeza; pues querer que sirva namás que pa unes poques coses o que sirva pa too; pues querer falalo o non.
—¿Quies dicir, mami, que somos como l’aire?
—Más o menos… Nun ta mal visto.
—Y eso ye malo, ¿non?
—Non, non, cariñu, ser aire ye precioso, guapísimo. El problema ye… ¿quién escucha al aire?

¡SÍGUENOS!

SUSCRIPCIÓN EN PAPEL

A través del teléfono (637259964 o 984109610) o el correo letrasatlanticas@gmail