Llámame etnógrafu, que queda más moderno

Antropóloga faciendo una entrevista pa una historia de vida, la ferramienta que dixebra antropoloxía y folclorismo.

José Ángel Gayol / Llicenciau en Derechu y en Antropoloxía. En Pravia y Peñamellera Baxa recurrieron a la contratación de desempleaos mediante programas de Taller d’Empléu pa la recuperación del patrimoniu etnográficu. En Proaza elixeron tamién esta opción pa remocicar venti fuentes y llavaeros. Amás, l’artículu apaecíu en La Nueva España de 5 d’agostu de 2010 terminaba trunfalmente declarando que “agora, Proaza yá tien quien cuide del so patrimoniu etnográficu”. En nenguna d’estes noticies s’ufierten referencies a una dirección d’obres axeitada por un antropólogu o cola so collaboración. Ensin más, los Ayuntamientos encargaron la tarea de rehabilitación d’obres patrimoniales, en dalgunos casos centenaries, a alumnos d’un taller d’empléu. ¿Son los profesionales más afayadizos pa cuidar del patrimoniu etnográficu asturianu?

Si s’atiende a les noticies qu’apaecen nos medios asturianos sobre’l patrimoniu etnográficu, la política, la economía o los vezos sociales de los asturianos, ye difícil qu’un antropólogu nun se decate de l’ausencia cásique completa qu’hai n’Asturies d’antropoloxía. Estayes d’análisis social y cultural que n’otros territorios, como Galicia, Cataluña, Valencia, Andalucia o’l País Vascu, son marcu d’estudiu y referencia pa los antropólogos, n’Asturies vénse invadíes según parámetros non siempre científicos, en delles ocasiones por poco rigurosos y n’otres por incompletos.

Si salimos del país, les polémiques en medios de comunicación xeneralistes a cuenta d’artículos firmaos por antropólogos nun son dalgo raro en Estados Xuníos, Gran Bretaña o nos países de Centroeuropa. Nuna entrevista recién, Thomas Hylland Eriksen esplicaba la grande participación pública d’antropólogos en Noruega pola esistencia d’una tradición antropolóxica de intervención na vida social. Los antropólogos noruegos “salen a la vista del públicu” y Eriksen amuesa una voluntá d’asumir un compromisu colo non-académico. “Doi charres antropolóxiques en tou tipu de contestos non-académicos, dende clubes Rotarios hasta oficines de burócratas del sector públicu y asociaciones de pensionistas alredor del país”, declara l’antropólogu noruegu.

Esta tradición nun esiste n’Asturies y too ello amenorga la calidá de les investigaciones que se lleven a cabu sobre’l nuestru patrimoniu cultural (cásique nunca por antropólogos), asina como los trabayos que se realicen col envís de desarrollar polítiques públiques (puestes en marcha ensin nengún estudiu previu). Pue destacase el llabor de Roberto González-Quevedo coles sos investigaciones antropolóxiques y la dirección de la revista Cultures, o les conferencies y charles d’Adolfo García Martínez. Dos cumales en metá del desiertu. Ye vultable, por exemplu, lo ruin que ye’l venceyamientu de l’antropoloxía asturiana colos museos etnográficos. Salvo’l Muséu del Pueblu d’Asturies, que collabora de cutiu con antropólogos nes sos iniciatives, llibros y proyectos, o l’Ecomuséu de Somiedu, diseñáu por Adolfo García Martínez, los museos son frutu bien d’iniciatives privaes que busquen l’apoyu de los Ayuntamientos, o bien d’iniciatives municipales dafechu, ensin qu’en nengún casu l’antropoloxía articule los contenidos de esos caxones de xastre en que se tienen convertido estos museos, nin que’l personal que los atiende sían antropólogos nin malpenes estudiantes d’antropoloxía.

Falta una facultá d´Antropoloxía

N’Asturies, dase un tracamundiu peligrosu de conceptos y nomes que perxudica l’estudiu de la cultura asturiana con visiones adulteraes o sesgaes. Les conferencies que s’organicen dende asociaciones, foros ciudadanos o los mesmos museos etnográficos son impartíes por xente qu’abonda nun voluntarismu que non siempre cuaya en calidá. Otres veces, y cola cuenta de glosar la vida de dellos personaxes relevantes de la intelectualidá asturiana, espétase-yos el títulu d’etnógrafos, cuando se trataba de  folcloristes más o menos rigurosos. Inclusive foi’l casu d’un historiador acreditáu qu’impuso’l títulu d’etnólogu a un señor que viviera en dómines nes que la etnoloxía nin esistía.

El antropólogu Adolfo García trabayando nel campu.

D’esta miente úsase la pallabra folclor, etnografía, etnoloxía y antropoloxía nuna gradación de prestixu que s’aplica de manera asemeyada a les persones que exercen esos llabores (folclorista, etnógrafu, etnólogu y antropólogu respectivamente). L’empléu de les etiquetes ye indistintu y, al final, paez que lo mesmo val l’estudiu d’un etnógrafu que d’un folclorista, que d’un etnólogu, bastando con presentase como antropólogu o como cuadre. El barullu de términos y definiciones, que nun se da n’otros llaos, sofita unos usos engañosos y un diletantismu peligrosu pa la reconocencia de l’antropoloxía asturiana y, de xeitu más xeneral, pa la formación d’un estáu d’opinión sólidu sobre cuestiones sociales, patrimoniales, educatives, turístiques, industriales, culturales…

“Agora mesmo folclor ta mui mal visto, y la etnografía ye un eufemismo políticamente correctu de folclor. Naide diz que ye folclorista, sinón etnógrafu, una palabra que queda meyor, suena más moderna. Por embargu, munchos de los que se dediquen al folclor nun tienen demasiada idea…”, llaméntase l’antropóloga Yolanda Cerra Bada, profesora-tutora d’Antropoloxía Social y Cultural de la UNED. Nel mesmu sen, Adolfo García Martínez, tamién profesor-tutor de la UNED, decátase de que los estudios qu’hai n’Asturies sobre amagüestos, esfoyazas o ritos de pasu fáenlos malos etnógrafos, “que se llimiten a describir el fenómenu social. Pero eso nun ye etnografía sinón folclorismu, que ta mui bien, que ye mui guapu, pero que nun sirve de nada… ¿Por qué? Porque nun hai una esplicación holística, una interpretación. Un amagüestu, como una mesa festiva, como un movimientu treshumante, hai que contestualizalu na propia comunidá. Van viéndose asina una serie de rellaciones múltiples, que son la esencia de la antropoloxía”.

Esta confusión y abusu de términos de prestixu como etnoloxía o etnografía ye difícil d’iguar, pola natura borrinosa d’estos conceptos. Adolfo García Martínez apurre dalgunes definiciones: “Folclorista ye aquelli qu’estudia un fenómenu determináu, que pue ser una bona descripción pero ta descontestualizada. L’etnógrafu ye aquelli qu’estudia esi fenómenu cultural, pero lu contestualiza. Depués, etnoloxía y antropoloxía son asemeyaes, esto ye, diferentes graos o niveles de xeneralización pa construir modelos interpretativos cada vez más xenerales a partir del comparativismu con toles sos llimitaciones”.

Entós, ¿cómo se pue distinguir a priori un bon trabayu etnográficu? Pa Yolanda Cerra, la clave ta nos estudios universitarios, anque con matices. La tentación ye suponer que n’Asturies nun hai antropólogos. Sin embargu, “n’Asturies hai más de cien llicenciaos n’Antropoloxía”. Pa ella nun ye cuestión de falta de númberu sinón de “falta d’una facultá d’Antropoloxía o, polo menos, un departamentu na Universidá d’Uviéu, o seique un títulu d’espertu universitariu”, que sirva de encontu a les iniciatives individuales y d’enseñanza qu’evite’l voluntarismu actual. “Pa mí, los estudios universitarios, non necesariamente antropóloxicos, anque sí de ciencias sociales, beneficien la calidá de la etnografía, mientres que’l que nun tien estudios tendrá más dificultaes pa facer una etnografía valiosa, y quedará en folclor. Con too, la llicenciatura tampoco ye imprescindible, porque un doctoráu o ser docente d’antropoloxía, nel casu d’aquellos que nun tuvieron opción de acceder a la carrera, asitia al investigador nun marcu nel que nun asitia la diletancia de llectures sueltes”.

Valdés del Toro y Gustavo Bueno

Ramón Valdés del Toro.

Les consecuencies costoses pa los estudios culturales asturianos tan ehí, pero l’orixe d’esta situación habría de buscase a finales de los años cincuenta. Daquella, aportó a Tapia de Casariego l’antropólogu Ramón Valdés del Toro. Nacíera n’Alcoy (Alicante) y pasara la mocedá en Tetuán (Marruecos) tres el fusilamientu del so pá pol bandu franquista la nueche del 19 d’agostu de 1936. Estudia en Valencia y Madrid y depués viaxa a París y Munich, onde sigue la so formación y entra en contactu cola etnoloxía. En 1959 consigue plaza de profesor d’instituto en Tapia de Casariego, y entama la traducción de Cristo y las religiones de la tierra, de Franz König, entóncenes arzobispu de Viena, cola gana munchu prestixu. De la dómina que pasa en Tapia ye un testu fundamental de l’antropoloxía española: Ecología y trabajo, fiestas y dieta en un concejo del occidente astur  (1976). El so trabayu y trayectoria profesional fai que Gustavo Bueno, acabante de llegar de Salamanca, lu llame pa la universidá d’Uviéu como profesor d’Etnoloxía.

Dende ochobre de 1965 da clases d’Etnoloxía na sección d’Historia y en 1966 nómenlu profesor axuntu d’Antropoloxía y Etnoloxía. Cuenta Valdés del Toro nuna entrevista que Gustavo Bueno quería facer dalgo asemeyao al Círculu de Viena, pero con forma elipse, con dos centros. Ensin dulda, Ramón Valdés del Toro aforoñaba yá unos conocimientos fondos en materia antropolóxica y convertiríase en pocu tiempu nún de los padres fundadores de l’antropoloxía española.

Pa llaceria nuestra, Bueno y Valdés del Toro nun tardaríen en chocar. Una chaval aventa un bote de pintura a Bueno y esti quier denuncialu a la policía franquista. Valdés del Toro píde-y que nun faiga nada pola mor de que’l castigu sía más duru que’l pecáu. Gustavo Bueno nun fai casu. L’anécdota que refier Valdés del Toro ye en realidá la señal d’un enfrentamientu ideolóxicu ente un home de dreches como Bueno y dalguien cola trayectoria y el pasáu a la manzorga de Valdés. Esta llucha d’intelectuales sáldase con una víctima principal: l’antropoloxía asturiana. Gustavo Bueno niégase a seguir dirixendo la tesis doctoral de Valdés del Toro. Elli sabe que los sos díes n’Uviéu tan contaos. En 1971, Eduard Ripoll, catedrático de Prehistoria de la Universidá Autónoma de Barcelona, ufrez-y dar clases d’Antropoloxía. Dende entós, la cátedra d’aquella universidá conviértese nun focu de investigación antropolóxica de primer orde.

La llábana desértica de l’antropoloxía asturiana cubrióse entós col escaezu, la diletancia y los esfuercios individuales. Hasta hoi. Según Yolanda Cerra, “na medida en que haya más antropoloxía, habrá más calidá na etnografía. Y los folcloristas dirán ascendiendo un peldañu, y los etnógrafos tamién”. Lo malo d’esti panorama ye’l borrinosu horizonte pa los antropólogos asturianos, en paraderu desconocíu o desconocíos pola sociedá que podía beneficiase d’ellos.

PUBLICADO EN ATLÁNTICA XXII Nº 30, ENERO DE 2014