El Milán, desidia ensin cuartel

Estudiantes nel Campus de El Milán. Semeya / Iván Martínez.

Rafa Balbuena / Hestoriador y periodista.

Semeya / Iván Martínez

El Campus d’El Milán, n’otra dómina cuartel del Exércitu de Tierra y güei sede de la Facultá de Filosofía y Lletres de la Universidá d’Uviéu, ye en munchos aspectos una especie d’islla dientro de la propia Universidá. Yá lo yera nos años noventa, cargando cola fama de contestatariu, bohemiu o llevantiscu frente a otres Facultaes más “formalistes” y “académiques”, acotaes en zones perifériques como El Cristo o Llamaquique. Muncho más integráu (daquella) nel vecindariu que lu arrodia, pero claramente aislláu d’esos otros campus con mayor variedá d’estudios, El Milán paez tar pagando agora’l preciu de la so condición diferente. En más d’un sentíu.

Basta una güeyada pel esterior pa ver qu’ellí nun cuerren años de vaques gordes. Espaciosu pero fríu, con potencial anque ciertamente descuidáu, nes paredes y ventanales surden pintaes, desconchones y una sensación de desdexamientu llatente, como de probitú mal llevada. Tres bloques diferentes conformen el recintu: al fondu, l’edificiu departamental, cola estructura antigua, heredada dafechu de los tiempos castrenses; tamién el más descuidáu. En medio, l’aulariu, d’estética daqué discordante col anterior y con él mesmu: megalómanu nes dimensiones pero anodín na decoración de lladriyu. Y nun llateral, la biblioteca, construída hai unos quince años enriba del últimu gran escampáu que quedaba dientro’l cascu urbanu. Diríase qu’axunta les otres dos estétiques como pa equilibrar dalgo que, de dalguna manera, nun concasa bien. Nin per dientro nin per fuera.

D’otra manera, y al rodiu de la calma desidiosa que reina nel llugar, tampoco nun pue dicise que per ellí surdan manifestaciones estudiantiles. Los 2.171 matriculaos nesti cursu contrasten cola fervedera xente que doblara de llargo cifra tala nes promociones pre-Bolonia. La fusión en 2010 de les tres Facultaes (Filoloxía, Hestoria y Filosofía) nuna sola yá fuera sintomática de que, no referente a masa estudiantil, lo d’El Milán nun yera una fiesta. Cualquier profesor certifica amás que, académicamente falando, tán anguaño más polarizaos que nunca, ensin términu mediu ente la desidia y la brillantez. Y en cuantes al propiu profesoráu, hai que velos como vivu reflexu de la Universidá española. Al marxe d’estatus ente los contrataos en precariu y los que tienen plaza en propiedá, la constante ye qu’abulten más rebeldes que los sos pupilos. Tienen en común tar afogaos por una burocratización bederre y por una carga docente que-yos pon cada vez más difícil la práctica tradicional del “50% clases, 50% investigación”. Súmense a ello los recortes presupuestarios y unes relaciones distantes –en dellos casos nidiamente hostiles– con un Rectoráu displicente davezu coles Humanidaes y podrá camentase que, n’efeutu, El Milán anda tan floxu de salú per dientro como per fuera.

Una clase con dos estudiantes. Semeya / Iván Martínez.

Del esplendor a la caída llibre

El Campus del Milán (“Campus de Humanidades de la Universidad de Oviedo”, na nomenclatura oficial) ye’l caberu complexu estudiantil qu’estrenare ex novo la Universidá na capital nos últimos treinta años. Si bien dende entós s’asitiaron nueves escueles superiores n’estremaos puntos urbanos (El Naranco, Los Catalanes), El Milán ñació con, ente otros, l’oxetivu d’agrupar nun mesmu espaciu les tres Facultaes a les que daba accesu la opción humanístico-llingüística del entós vixente COU. El proyeutu arrancare en 1989 pa finar cola dispersión de les Facultaes de lletres, que caltenía esbillaos los estudios de Filoloxía (na Plaza Feijóo), Xeografía ya Hestoria (nel Campus del Cristo) y Filosofía (en Llamaquique). Tal xuntanza axilizaba amás la tresversalidá nes Humanidaes, facilitando a los estudiantes matriculase en Facultaes afines pa cubrir les asignatures de llibre configuración requeríes nos nuevos planes d’estudiu, ensin tener que cruciar tola ciudá pa cubrir esi escasu 5% de clases previstes a la selmana.

D’esti mou, debidamente reformáu y acondicionáu, el vieyu cuartel d’El Milán estrenó nuevu usu nel cursu 1991-92, cola llegada efectiva de les Facultaes de Filosofía y de Xeografía ya Hestoria. Filoloxía entamaría a funcionar ellí al añu viniente, aniciándose asina una hábil maniobra pa dinamizar el distritu urbanu de Pumarín-Teatinos. Allugáu ente estos dos barrios, de marcáu calter obreru o popular –estremáu dafechu del centru capitalín, en tou casu–, y cola barrera de l’autopista A-66 separtándolu de la fastera oriental de la ciudá, el solarón d’El Milán taba per otru llau cercanu al Uviéu antiguu y a los exes comerciales de les cais Xeneral Elorza y Uría, coles estaciones de tren y autobús interurbanu bien a mano y con bayura de pisos alredor, n’alquiler a rentes afayadices pa grupos de xente mozo. Una oportunidá nidia pa dar nueva vida al barriu enteru, por mor del prestixu que les lletres aportaren hestóricamente a la Universidá asturiana. Y too al calor d’una masa de xente mozo estudiante que, pa enriba, cuntaba col plus d’internacionalidá del proyeutu Erasmus, col so constante afluyir de rapazos de toa Europa dientro y fuera les aules que facíen más atractiva entá esa “idea total” que cinca al conceutu de “vida universitaria”.

Tanta bonanza, coincidiendo cola euforia al rodiu del algame xeneralizáu d’un Estáu del Bienestar nel que nun paecía importar hipotecase al preciu que fuere, anició una relativa “edá d’oru” pa les tres Facultaes, que s’espardió a lo llargo la década de los noventa, empobinada por un accesu a la Universidá normalizáu yá de llargo y ensin torgues elitistes pa xente procedente de cualesquier clas social. Otramiente, yeren tiempos de xabaz inxenuidá nos que nun contemplar la posesión d’un títulu superior, fuere la que fuere, abultaba sinónimu de llabrase una esclusión sociollaboral carente de “dignidá”. Y anque la conocida cantinela de “eso d’estudiar lletres nun tien futuru” se sintiere en toes partes dientro y fuera del Campus, la demanda de places llegó a ver l’inauditu fenómenu del numerus clausus na especialidá d’Hestoria del Arte nun cursu académicu de finales de la década. Tan inesperáu finxu, raru abondo nes Humanidaes, marcó’l puntu cimeru d’El Milán, qu’entamaría cuasi darréu y adulces una cuesta abaxo que, pasáu tou esi tiempu, apunta güei a la pura caída llibre.

Los pasillos vacíos, una imaxen habitual del Milán. Semeya / Iván Martínez.

Bolonia y otres torgues

Nel añu 2008, momentu nel qu’españaba l’actual crisis económica, entraba en vigor el controvertíu Plan Bolonia. Concebíu como estratexa d’equiparación d’estudios universitarios a nivel européu, la so puesta en práutica real vieno a apuntalar el retrocesu efectivu nes Humanidaes, al empar que punxo negru sobre blancu un fechu que constata un veteranu profesor de Xeografía d’El Milán: “Agora tócanos a nosotros correxir les carencies y deficiencies qu’arrastren los rapazos dende Educación Secundaria y más p’atrás, como si esto fuere un colexu”. Otra profesora del área d’Hispániques esplica nesti sen que “aprovechando les adaptaciones requeríes cola entrada de Bolonia, nel primer cursu [de Filoloxía] hubo qu’implantar l’asignatura ‘Destrezas en español hablado y escrito’, col envís de que los alumnos recién llegaos alcanzaren niveles aptos en sintaxis y morfoloxía”. O seya, qu’aprendieren a redactar formalmente y a facer usu d’aquello que d’escolinos llamaren “llectura comprensiva”.

Tal midida da bona cuenta de cómo la enseñanza de lletres (la enseñanza toa, en xeneral) vien coxa dende Primaria y Secundaria, y magar que l’asignatura revirtió en bonos resultaos, “nel día a día llidiamos con situaciones surrealistes sobreveníes, como tener qu’atender a los padres enfoscaos d’un alumnu de 20 o 21 años, esixendo esplicaciones de por qué suspendisti al so probe rapacín”, llamenta Josefa Sanz, caderalga de Ciencies Hestoriográfiques. Álvaro Ruiz de la Peña, el so homólogu en Filoloxía y tamién veteranu del campus, define asina’l día a día: “Tamos nuna Facultá desierta, ensin vida estraacadémica: nin ciclos, nin conferencies, nin meses redondes, nin escritores invitaos… Solo dir a clase y marchar. La desmotivación y el desinterés tán ehí, l’alumnáu percíbelo y asina ye lóxico que la frustración tea xeneralizada”.

Non menos ablucante ye la deriva estatutaria del profesoráu. Nel Departamentu d’Hestoria, con siete árees, namás queden cinco caderalgos en total “y d’equí a dos años tócanos xubilanos a tres”, prosigue la profesora Sanz. “Acaba fallecer una compañera y dende’l Rectoráu tovía nun se nos dixo nada sobre si va cubrise la so plaza, anque toos sabemos que non”, añaden dende un despachu asitiáu nel mesmu pasiellu. El cuadru de caderalgos queda en cuadru, valga la redundancia, y ente los que tienen papeles en regla los más afortunaos son los profesores titulares, anque pa la provisión d’una nueva plaza nel Departamentu d’Hestoria nel cursu que vien –la única a esi nivel en tol campus– “traen una profesora d’otra Universidá que pa enriba nun la pidió, saltando’l procedimientu habitual de dar plaza a personal propio, y eso que tenemos bien de profesores que lleven años solicitándola”, protesta Josefa Sanz. Y tovía ta frescu’l casu de la plaza de profesor ayudante del filólogu Miguel Alarcos –llograda tres un procesu selectivu que nun se sacó a concursu públicu– que yera formalmente inesistente. El casu llegó finalmente al Tribunal Superior de Xusticia, qu’anuló’l nomamientu y la plaza d’Alarcos, finando con dos años de pleitu que nin Rectoráu nin Facultá fueron quien a solucionar, nin a dar siquiera una imaxe coordinada.

Y ehí ta otru problema enquistáu: la Facultá como conxuntu de profesionales estancos. Otru profesor d’Hispániques confirma que “la incomunicación esistente dientro de cada área, y nun falo yá de Departamentos, ye una constante dafechu”, fechu patente “nes xuntes del Conseyu de Facultá, onde se ve claramente esa desidia pa potenciar nada que tea relacionao cola tresversalidá de les lletres”. Y, mientres, los alumnos que destaquen na investigación y que nun desisten en dedicase a la docencia universitaria “doctórense equí, pero, al nun tener posibilidá de quedase, busquen y alcuentren plaza n’Universidaes de Francia, Italia o América Llatina”, tercia un profesor del área de Filoloxía Angloxermánica. “Y llueu dicen que la fuga de cerebros morriera col comunismu”, apostiella con sarcasmu.

Fuera del so despachu pervese una pintada na muria del edificiu departamental que pon “Campus de decadencia”. Sintomático, en fin, que naide faiga’l mínimu esfuerzu por borrala. Quiciabes seya l’últimu aliendu de la cultura humanística, esa qu’inclusive nos tiempos de barbarie tovía respeta los epitafios.

PUBLICADO EN ATLÁNTICA XXII Nº 43, MARZO DE 2016