Nel cantu la memoria

Llan de Cubel nos años noventa, col productor Lisardo Lombardía. Semeya / Jesús Farpón.

Ignaciu Llope / Lletrista de Llan de Cubel.

1983, seique. Y los xueves, cuando Fernando Largo daba acabu al so programa «Gaitas, arpas y zanfonas», armábase tertulia musical -pero realmente diba enforma más allá de la música- nel chigre El Nido, en Ciudá Naranco. Rexentáu por Milio’l del Nido, qu’oficiaba tres de la barra cual sacerdote candial y sabiu, esti chigre foi una caverna -la The Cavern d’Uviéu…- pa la música asturiana na que músicos y aficionaos compartieron suaños mentanto unes nueches d’intensa creatividá. Y depués del programa de Fernando, per ellí paraben Ástur Paredes, Lisardo Lombardía, Xuacu Amieva, Xuan Prado y tamién Marcos Llope, Fonsu Mielgo, Chus Bello o Elías García. Estos cuatro últimos un día de 1984 xubienon a un escenariu que yeren una media docena de meses xuntes pa dar el so primer -llamemos con xenerosidá- conciertu, cola participación de Guzmán Marqués y Daniel Lombas, y ello sonorizáu colos altavoces qu’usaba’l PSOE nos sos mítines, no que foi otra de les esllendantes xestiones de Milio. Y como diría Fernando Largo na señaldá del tiempu y la distancia: «Aplausos pa Llan de Cubel».

Depués vendría la so primer grabación nel certame d’harpes d’avientu de 1984 y asoleyada nel discu «Arpa céltica» nel 1985. Y asina, selemente, entamaba l’aventura musical imprescindible pa entender la evolución de la música tradicional asturiana de los últimos trenta años. Porque, al enorme talentu individual de los sos componentes, axúntase esi milagru que ye crear un son únicu, identificable yá como marca del grupu. Una potente llinia rítmica cola lluz del bouzouki d’Elías García y la potencia de la guitarra de Xel Pereda matízase cola percusión de Fonsu Mielgu y val pa construyir -certeru y precisu como’l corte del fierro dulce- la llinia melódica onde’l diálogu de la flauta de Marcos Llope y la elegancia del vigulín de sir Simon Bradley pon cola gaita de Xuan Rodríguez la emoción como solo lo son a faer les coses verdaderes. Porque la música de Llan de Cubel ye música con alma, porque en caúna de les sos melodíes habita la gramática secreta de la tradición musical asturiana, porque la obra d’estos músicos supo traducir al llinguaxe de la modernidá la hestoria milenaria del pueblu asturianu.

Usando nesa traducción códigos de la cultura contemporánea, estos nuevos músicos tradicionales interpretaron acertadamente la encruciada na que la cultura asturiana allugó nos finales años del sieglu XX. Y, lo más importante, amosaron cola materialidá de la so obra cómo la identidá ye un potente material pa la creación, pa construyir discursos artísticos de sonadía universal dende esi requexu na fin del mundu onde la tierra garra’l nome d’Asturies. Y esto asumiendo cola naturalidá precisa la condición atlántica de la cultura asturiana, participando nesi diálogu intercélticu de bayurosos resultaos pa la música asturiana. Un diálogu del que les abondoses versiones de música asturiana, al traviés de la man de Llan de Cubel, que músicos irlandeses, escoceses o bretones grabaron y graben nel so repertorio, ye ún de los exemplos más obvios.

Cinco discos -que son ya hestoria viva d’Asturies- y cientos de conciertos, festivales y recitales son la herencia emocionante d’unos músicos que foron quien a lleer la música asturiana como quien descubre, y abre, y cree, na delicada ayalga de la memoria inmensa d’un pueblu. Y creyeron.

PUBLICADO EN ATLÁNTICA XXII Nº 38, MAYO DE 2015