Patrimoniu cultural asturianu: estáu de la cuestión (I)

Seamus Heaney con miembros de la Fundación Belenos y colaboradores de la revista ‘Asturies’.

Dani Cueli / Fundación Belenos.

Esti añu recién estrenáu –2016– la Fundación Belenos ta de cellebración: cúmplense venti años dende que s’entamó a espublizar Asturies, revista que lleva tou esti tiempu siendo, como bien indica la mítica fras que completa’l so nome, memoria encesa d’un país, dende una perspeutiva interdisciplinar. Dos décades y 35 númberos dempués algamárense sobradamente los oxetivos plantegaos nel so aniciu, y la publicación convirtióse, ensin dulda, nel principal proyeutu de los que vien desendolcando esta entidá cultural. 35 númberos que vienen a ser, más o menos, unes 3.500 páxines sobre les cultures asturiana y atlántica en toles sos estayes, escrites por xente que va dende nomes tan ilustres como Seamus Heaney, Francisco Marco Simón, Jean Markale, José Luis Maya González o Raymond Carr –aprovechamos pa facer alcordanza de los que yá nun tán ente nós– hasta toos y ca ún de los miembros de la propia Fundación Belenos.

Esta efeméride, que cellebraremos nel so intre nun sólo cola espublización del númberu correspondiente a esti añu –el 36– sinón con dalguna cosina más, ye la escusa qu’emplegamos pa esta güeyada atrás que mos val, lo primero, pa decatamos de qu’estos venti años caberos foron los más bayurosos en cuantes a l’actividá de la Fundación Belenos, aniciada nun yá llonxanu 1983. Asina, en 1998 completábase la xera editorial col nacimientu de la coleición de monografíes Cartafueyos de Belenos, dientro de la que s’asoleyaren yá nueve númberos, y nel añu 2000 arrancaba’l Seminariu d’Estudios Asturianos, que de magar entós aconceya cada mes de payares, en La Puela d’Allande, a un bon piñu de persones interesaes en tolo que cinca a la cultura de nueso. Revista, cartafueyos y seminariu ñacieron nun momentu fundamental de la nuesa hestoria como pueblu: aquel nel qu’abandonabamos un sieglu nel que se punxo fin a la forma tradicional de vida d’esti país, prácticamente inmutable nos dos últimos sieglos, y entrábamos n’otru nel que’l llabor tenía d’empobinase, fundamentalmente, a caltener la esencia de lo que fuimos y de lo que queremos siguir siendo, de lo que queremos que mos identifique como asturianos nel mundu.

Nesi sen vien desencolcándose’l trabayu de la Fundación Belenos: la recuperación y defensa de la cultura asturiana en xeneral, del nuesu patrimonio material ya inmaterial. Y, si tomamos como referencia estos venti años caberos –aprovechando como dicíamos al entamu la efeméride protagonizada pola revista Asturies–, podemos plantegar la entruga que vien darréu: ¿cómo tán les coses anguaño, con respeutu a 1996? Pues mal, y lo cierto ye que taríen muncho peor de nun ser por coleutivos y persones que, como la Fundación Belenos, son los que tiren del carru a la hora de caltener la identidá d’un pueblu que se va esmuciendo col pasu’l tiempu… Porque a les Alministraciones públiques ya instituciones oficiales –Gobiernu del Principáu d’Asturies, conceyos, Universidá d’Uviéu, RIDEA…, sacantes l’Academia de la Llingua Asturiana, claro ta–, como dalguién dixo una vegá, “nin tán nin se les espera” y tolo más qu’aportaren nesta dómina fueron pildorines que nin siquiera tuvieron l’efeutu de placebu.

Si entamamos esti pequeñu analís pol patrimoniu cultural inmaterial, ye mester tratar la situación d’una de les principales señes d’identidá que tien el pueblu asturianu: la so llingua. Y el resume que se puede facer d’esta dómina ye, por desgracia, mui cenciellu: nun s’avanzó nada, ello ye, siguimos ensin una oficialidá que garantice los nuesos drechos llingüísticos, magar la reforma del Estatutu d’Autonomía de va unos años. Tamién ensin la naguada Filoloxía Asturiana y con una situación nes etapes obligatories del enseñu apavoriante. Lo mesmo pasa con la radio televisión pública asturiana, que tenía de ser otru de los encontos de la normalización del idioma y na que’l mesmu tien una presencia testimonial y pa lo de siempres: pa falar de cultura y echar unes risotiaes. Y mientres, l’asturianu ta perdiendo falantes a una velocidá ablucante –no qu’inflúi, evidentemente, la situación demográfica del país– nun sólo en númberu, sinón en cuantes a la calidá de la llingua falada polos mesmos. Nesta estaya namás que podemos reseñar un par d’apuntes positivos: la recuperación y oficialización de la toponimia tradicional, magar que nun tolos conceyos tienen tovía’l so Decretu de Toponimia correspondiente y que tovía tengamos qu’asistir a la involución de los determinos tomaos nel so intre –Les Arriondes ye l’últimu d’estos ensin sentíu–, y les ayudes económiques que dende l’Alministración se fueren empobinando a la producción editorial n’asturianu, la más bayurosa de la hestoria en tolos xéneros, anque eso más qu’a una política seria arrespuende al aquello de tener tranquilu a determináu sector asturianista. Más nada, y lo cierto ye que la situación entama a ser mui esmoleceora, más anguaño que paez que tamos nun tiempu nel que’l movimientu de reivindicación llingüística –nun sabemos mui bien si por cansanciu o por qué– paez que ta desactiváu.

Asina les coses, la información recoyida de la tradición oral, nun sólo por cuestiones de caltenimientu de la llingua, fízose y fáese fundamental. Y quiciaes nesti sen vienen les poques alegríes a la hora de mirar pol nuestru patrimoniu cultural inmaterial. Quiciaes equí sí que con más presencia d’entidaes públiques, anque siempres en precario, como son el casu de l’Academia de la Llingua Asturiana y del Muséu del Pueblu d’Asturies –onde rescamplen tanto l’Atlas Sonoru de la Llingua Asturiana como’l trabayu desendolcáu, dende cuantayá, por Jesús Suárez López– pero siempre acaba siendo la “iniciativa privao” la que va per delantre, destacando nesti casu’l llabor de coleutivos etnográficos y folklóricos y de persones como’l nuestru Alberto Álvarez Peña, que nestes dos décades regalómos una treintena de llibros los más d’ellos sobre lleendes, mitos y tradiciones nun momentu clave, nel que tán desapaeciendo los últimos informantes braeramente “bonos”, o Xosé Antón Fernández ‘Ambás’, na estaya musical y nes tradiciones del antroxu: una de les meyores noticies que podemos dar tres estos venti años ye la recuperación d’unes diez mazcaraes d’iviernu, remocicando una tradición que taba prácticamente nel cantu’l desaniciu y qu’anguaño vive’l meyor momentu polo menos de los últimos ochenta años.