Patrimoniu cultural asturianu: estáu de la cuestión (y II)

Portada de la revista ‘Asturies’, editada por la Fundación Belenos.

Dani Cueli / Fundación Belenos.

Mentamos la música, y quiciaes ye esta otra de les estayes nes que nos últimos venti años s’esperimentó una auténtica revolución cultural como motor de caltenimientu y espardimientu de la nuesa identidá, nun sólo no tocante a la tradición musical sinón tamién no que cinca a la llingua, n’ocasiones siendo fieles a los patrones afitaos y n’otros reinterpretándola dende la contemporaneidá, llevándola a un altor talu qu’en dalgunos casos llegó a competir con otros xéneros musicales incluso a nivel mundial –falamos del casu del gaiteru José Ángel Hevia Velasco– y que tien una presencia más que bultable nel perconocíu Festival Intercélticu d’An Oriant / Lorient, casualmente dirixíu dende va unos años pol asturianu Lisardo Lombardía, cargu que comparte cola presidencia de la Fundación Belenos, nun reconocimientu internacional a lo asturiano que tovía nun se da na nuesa tierra por parte de les instituciones oficiales (nel casu de Lisardo, y como una esceición que confirma la regla, sí que se vio reconocíu oficialmente pol Gobiernu asturianu cola Medalla de Plata d’Asturies 2015).

El casu ye qu’al patrimoniu cultural material nun-y va muncho meyor. La única nota “positiva” que-y podemos poner a los que mos gobiernen foi l’aprobación de la Llei 1/2001, de 6 de marzu, de Patrimoniu Cultural. Evidentemente lo de positiva tien de dir necesariamente ente comines porque ehí quedó la cosa, en papel moyao como se suel dicir, ya que sigue ensin aplicase. La meyor preba d’esto ye que’l reglamentu que la desendolca aprobóse catorce años dempués. El resultáu ye l’esperáu, mui asemeyáu a lo que pasa cola llingua: el nuesu patrimoniu etnográficu desapaez pali que pali, entamando pol iconu que constitúin horros y paneres, pero siguiendo pola casa tradicional y toles construcciones venceyaes a la mesma, asina como otres que formaron parte d’una forma de vida non tan llonxana, como llavaderos o molinos. Situación a la que contribúin unes normatives urbanístiques febles y que tampoco nun s’apliquen dende los conceyos, llevando a los nuesos pueblos a paecese más a faveles brasileñes qu’a otra cosa. La situación fáese estensiva al patrimoniu monumental y relixosu que, salvo honroses esceiciones, tamién cae a cachos, siendo los casos del palaciu de Celles (Sieru) y del monesteriu de San Antolín de Bedón (Llanes) los dos meyores exemplos.

Y por perres, evidentemente, nun ye: ehí tenemos los millones d’euros marafundiaos n’espacios “culturales” como’l Centru Niemeyer d’Avilés o Llaboral Ciudá de la Cultura en Xixón, tán alloñaos de la realidá d’esti país como los dirixentes que puxaron por ellos, o les reproducciones de plásticu tipo’l Parque de la Prehistoria de Teberga. Y nesta estaya, por desgracia, la iniciativa privao sensibilizada col tema poco pue facer, porque precisamente’l calter priváu de la mayoría d’estos elementos fae imposible intervención esterna nenguna, quedando too al debalu, en manes de lo que bonamente fagan dalgunes persones especialmente sensibilizaes, que les hai, a les que-yos da por mirar por aquello qu’heredaron.

Nun podemos escaecer esi otru patrimoniu de los asturianos que ye’l natural, ciertamente mui condicionáu dende sieglos polo cultural… hasta va unos pocos años, nos que’l capitalismu más xabaz, lo estrictamente económico, ye’l que lu lleva tresformando ensin xacíu y alloñándolu cada vegada más d’esi “paraisu natural” que tovía mos siguen intentando vender a llariegos y foriatos. Requexos paradisíacos tovía queden nesti país, sí, pero mecíos con mines d’oru y carbón a cielu abiertu, llanteros de pinos y ocalitos, canteres, llinies d’alta tensión, carreteres absurdes… que taracen el nuestru paisaxe. Un panorama que, combináu colo qu’asocede col patrimoniu cultural material ya inmaterial ye bona preba de que mos empobinamos ensin remediu haza’l desaniciu como pueblu, haza un futuru nel que, si nun somos a remedialo, Asturies quedará namás como un simple puntu xeográficu nun mundu al que nun-y va, cierto ye, muncho meyor.

Asina les coses y énte esti panorama tan murniu, ¿podemos realmente facer daqué? Nós, sinceramente, creyemos que sí, y la revista Asturies ye un exemplu de que, polo menos, tamos intentándolo. Lo mesmo qu’esta otra revista, ATLÁNTICA XXII, que mos ufre les sos páxines pa facer un analís sobre l’estáu de la cuestión del patrimonio asturianu, breve y quiciaes poco posáu, anque a fin de cuentes esi analís con más detalle ye’l que venimos faciendo al traviés de les páxines d’una revista de la que dientro d’otros venti años cellebraremos el so cuarenta aniversariu. Tamos convencíos d’ello; tenemos que siguir convencíos d’ello.