El grupu d’intervención inmediata de l’arqueoloxía industrial n’Asturies

José Luis Soto, Rolando Díez y Ángel Vallina nel exterior del socavón de la Rebaldana de Mieres. Semeya / Andrés Rodríguez Monteavaro.

Hai dalgunos años falar de conservación del patrimoniu n’Asturies taba relegao a determinaos círculos minoritarios que yeren vistos con recelu poles instituciones y el restu de la población. Esto víase acrecentao si de lo que se trataba yera de toos aquellos vestixos que quedaran como restos d’un pasáu de producción y trabayu A día de güei grandes empreses, conceyos o sindicatos avérense a la defensa del patrimoniu industrial emburriaos por iniciatives populares que tán demostrando a la sociedá la necesidá de lluchar pola memoria colectiva. Un claru esponente d’ello ye la Sección de Arqueología Industrial de la Asociación Cultural y Minera Santa Bárbara.

Andrés Rodríguez Monteavaro / Fotógrafo e historiador.

Nel añu 2009, un grupu de mineros prexubilaos de la cuenca’l Caudal decidió crear una asociación cola idea de difundir y protexer los restos del pasáu industrial del so entornu inmediatu como rempuesta a la perda de patrimoniu material y inmaterial que se taba produciendo n’Asturies. Dende’l principiu l’obxetivu foi claru: consiguir, al traviés de la participación ciudadana, llegar a aquellos llugares a los que les Alministraciones nun pueden o nun quieren llegar. Pa ello, col aquel de xunir fuerces y nun crear más grupos minoritarios d’acción social, proponen a la Asociación Cultural y Minera Santa Bárbara, que surdiera en 2002 col envís de recuperar la fiesta de la patrona de los mineros, formar parte de la mesma como grupu independiente que se dedicaría solo a la xestión y la recuperación con carácter históricu y arqueolóxicu. Asina surde la Sección de Arqueología Industrial, qu’en palabres de Jose Luis Soto, ún de los sos voceros, ye “un grupu d’intervención inmediata p’actuar rápidamente n’elementos que grandes elefantes como Hunosa o’l Gobiernu del Principáu tardaríen años en solucionar”.

Nun primer momentu, les actividaes yeren d’análisis y difusión, cola creación d’unes xornaes de ponencies y debate. “Teorizar ta bien, pero yá hai muncha xente que lo fai. Pa nosotros lo importante yera tener los pies na tierra y actuar no que conocíemos bien: los restos materiales de la minería del Caudal”. La primera acción sobre’l terrenu foi nel Socavón de la Rebaldana, onde’l trabayu más duru nun foi’l físicu sinón el de relación coles instituciones. “Cuando llegamos a la reunión cola Dirección Xeneral de Patrimoniu pa dici-yos que díbemos facer una sextaferia”, cuenta Rolando Díez, otru de los miembros de l’asociación, “los funcionarios nun sabíen nin lo que quería dicir aquella palabra. Foi mui duro’l xestionar una montonera de papeléu mientres el patrimoniu diba deteriorándose a pasos axigantaos”. Actualmente, la relación cola Alministración ye bona, afirmen, anque “nun nos cuesta salir a la palestra y dicir qué se ta faciendo mal y quién ye’l que lo ta faciendo”.

La filosofía de trabayu ye clara. Pa ellos, n’Asturies la sociedá nun dexó de dase la espalda a lo llargo de la historia, demostrando una falta d’amor propio y una resignación que l’abocó al fracasu. En vez de demandar, l’aciertu d’esti grupu céntrase en qu’ellos proponen soluciones y llévenles a cabo, con o ensin ayudes esternes. “Poco a poco vamos texendo una rede”, explica Soto, “y cada vez más persones s’arimen a nós pa prestanos la so ayuda y trabayar al nuestru llau. El mesmu Principáu tiennos en cuenta cuando realiza dalguna intervención porque si nun vien a nós, somos nós quien vamos allí y decimos cómo creemos que se tien que facer”.

La sociedá marca el camín

La financiación, que suel ser ún de los temes más complicaos a la hora d’enfrentase a la rehabilitación y adecuación d’espacios, nun ye un problema pal colectivu. “Namás nos metemos en proyectos que podemos asumir. La colaboración económica pública y privada ye importante, ye l’aportación particular de munches persones que col so trabayu dan una ayuda inestimable pa desarrollar los proyectos. D’esa manera, ye la sociedá la que-y marca el camín a seguir a les instituciones y non al revés”, espliquen.

Los miembros de l’asociación tienen claro que los conceptos de cultura y intervención colos que se manexen son mui diferentes a los que pueden tener les Alministraciones. “Mientres que’l Gobiernu cree qu’apostar pola cultura equival a apostar pol turismu y facer de los asturianos una sucursal de la metrópoli, nosotros creyemos que defendelo consiste en reapropianos de lo nuestro y nun dexar que muerra la cultura colectiva de les persones que trabayaron, nesti casu, na cuenca’l Caudal”. Creen que se pueden siguir faciendo munches coses, pero que la desaparición de los vestixos del pasáu ye imparable y que’l dañu ta fechu yá. “La mala xestión de los centros d’interpretación per parte del Principáu demonizó un modelu que bien dirixíu funcionaría ensin dengún tipu de problema”, apunta Soto, que cree que “les Alministraciones tuvieron de siesta hasta agora y asina siguen, mientres que notros países nos lleven miles d’años de ventaxa. Agora la sociedá ta emburriando por ello, sinón nun farían nada”.

Na actualidá, les actividades del colectivu alternen la dixitalización d’un archivu fotográficu cola rehabilitación del cementeriu protestante de la Fábrica de Mieres. “Nós, tan rápido tamos na oficina como garramos el picu y la pala”, apunten. Les perspectives de futuru de l’asociación son bones, con un fuerte crecimientu del númberu de persones que se presten a colaborar y trabayar con ellos. La difusión d’un mensaxe en positivu y l’apuesta pola participación ciudadana p’apropiase y trabayar sobre los espacios públicos ensin depender de les instituciones fai de l’Asociación Cultural y Minera Santa Bárbara unu de los pilares de la recuperación colectiva de la memoria del pueblu trabayador asturianu.