Votái a Asturies

Mitin d’Unidá Rexonalista na campaña electoral de 1977 na plaza de toros de Xixón. Semeya / Mari Luz Fernández (La Transición en Asturias).

Fue una bayura de colectivos, xente independiente, feministes y partíos revolucionarios ensin llegalizar, pero con Unidá Rexonalista nació fai cuarenta años la esquierda asturianista, un espaciu políticu que nun acaba de cuayar. La candidatura presentóse a les primeres elecciones el 15 de xunu de 1977 y los sos probes resultaos ficieron bien curtiu un proyeutu que n´otres Autonomíes acabó en partidos con un pesu destacáu.

Eduardo Abad García / Historiador.

Diecinueve meses dempués de la muerte na cama del dictador Francisco Franco convocábense les primeres elecciones plurales n’Asturies dende febreru de 1936. A la altura de xunu de 1977 la unidá de les fuercies antifranquistes d’Asturies p’algamar la rotura democrática yera solo un vagu recuerdu del pasáu. El referéndum ensin llibertaes convocáu por Suárez el 15 d’avientu de 1976 pa reformar el franquismu algamó un 93,16% de sofitos n’Asturies y solo el 26,98% de los y les asturianos/es siguieron la conseña de la oposición antifranquista, l’abstención.

Tres d’esi batacazu, los históricos partíos d’esquierda (PSOE y PCE) dispusiéronse a midir sos fuerces electoralmente por primer vez dende la II República, pero nun yeren los únicos actores nesa fastera política, na qu’abondaben sigles a so esquierda con presencia activa nos movimientos sociales. Pesie a que nun se suel recordar, a la altura de xunu del 77 una gran parte de los partíos d’esquierdes y republicanos taben ensin llegalizar y sufríen tovía persecución. Anque paeza mentira, una de les máximes aspiraciones de la esquierda antifranquista yera que’l franquismu ensin Franco-yos reconociera llegalmente el so estatus. La “conquista” de la llegalización. Los tiempos aceleráronse a marches forzaes y naide quería quedar atrás.

Pa tratar de frayar esa dinámica les fuercies de la esquierda revolucionaria asturiana trataron de buscar un frente xunitariu. Por eso, a entamos de 1977, creábase el Bloque Asturianu d’Izquierda (BAI) formáu pol Movimientu Comunista d’Asturies, Reconstrucción Socialista d’Asturies y lo que sedría el Partíu Comunista de los Trabayadores d’Asturies (anteriormente OPI). Ente los sos oxetivos alcontrábanse el reconocimientu plenu de les llibertaes democrátiques, la disolución del tol aparatu franquista, la amnistía total o el drechu al autogobiernu d’Asturies.

Esi foi ún de los embriones de la candidatura d’Unidá Rexonalista nes elleiciones de xunu de 1977. Pero la formación d’UR nun se puede desplicar ensin otros munchos factores qu’acabaron confluyendo nesta candidatura xunitaria del antifranquismu rupturista y con conciencia rexonal. D’una parte, atopábase el rexonalismu cultural de la revista Asturias Semanal o el trabayu de Conceyu Bable, cruciales pa desplicar el surdimientu d’una concencia asturianista. Por otru llau, tamién destacaron dellos movimientos sociales como’l feminista, el vecinal o l’obreru, representaos pola Asociación Feminista d’Asturies o por sindicalistes venceyaos a CCOO y USO. Amás, foi mui importante el pesu d’independientes con una llarga trayectoria nes lluches sociales. Tamos falando de persones del pesu d’Antonio Masip, Hevia Carriles, Aida Fuentes, Xose Lluis García Arias o Amelia Valcárcel, ente otros.

La candidatura d’Unidá Rexonalista echó a andar cola presentación el 15 de febreru de la “Comisión Gestora para una candidatura Unitaria, Democrática y Regionalista”, creada tamién a entamos de 1977. Nella participaron delles organizaciones de sensibilidaes estremaes. Taben el BAI, el Partíu Socialista Popular d’Asturies (PSPA), persones independientes y pequeños coleutivos. Pero ensiguida llegaron los primeros contratiempos. EL PSPA de forma prematura abandonó la comisión col envís de presentase coles sos sigles, dexando tol pesu de la candidatura al BAI y los independientes.

Un “mangaráu” de xente diversa

Pegatina d’Unidá Rexonalista. Colección Miguel Sánchez Gutiérrez.

Pa poder presentase a les elecciones baxo la fórmula d’agrupación d’electores ficieron falta 763 firmes, recoyíes en tan solo 36 hores. Pesie al vetu de los grandes partíos, fueron munches les firmes recoyíes d’ente la militancia d’esquierdes. Pocu a pocu medraron los sofitos a la candidatura. El Partíu Comunista d’España (VIII-IX Congresos), formáu por comunistes ortodoxos que naguaben pola vuelta al “PCE de José Díaz”, pidió l’abstención pa los comicios en tol Estáu, sacante n’Asturies, onde participó activamente n’UR. Tamién foi singular el sofitu del Partíu del Trabayu d’España, qu’en casi tol restu del Estáu impulsó la creación del Frente Democráticu d’Izquierdes (FDI).

Un problema surdió a la hora de confeccionar les llistes, especialmente colos puestos de cabecera. Munchos de los participantes en tol procesu reafirmen que la idea orixinal yera qu’Antonio Masip encabezara la candidatura, por ser bien conocíu y venir d’una familia con recursos. L’orixe plural de los participantes xunío a la eterna rivalidá Uviéu-Xixón ficieron que se buscara una alternativa de consensu. Ye por eso que de númberu ún diba Aida Fuentes (Llangréu) frente al númberu dos, Antonio Masip (Uviéu), o’l númberu 3 Hevia Carriles (Xixón). Aida yera antigua militante de la Unión Sindical Obrera (USO) y de la Juventud Obrera Cristiana (JOC), asina como activa militante nel Movimientu Ciudadanu del Valle del Nalón. Yera la segunda vegada, dende Dolores Ibárruri ‘Pasionaria’, qu’una muyer encabezaba una llista electoral n’Asturies.

Baxo’l lema Votái a Asturies la campaña centróse fundamentalmente en temes asturianos, anque’l tratamientu de los mesmos foi mui diferente según les persones qu’interveníen nos mítines, fiel reflexu de la heteroxeneidá política d’UR. Por primer vegada na Historia parte de la propaganda electoral fízose n’asturianu, anque siempre respetando el billingüismu. Nesti terrén llama l’atención cómo nel manifiestu “A la xente asturiana” dábase un escasu espaciu al problema llingüísticu. Nel cartafueyu reivindicábase la implantación de la llingua “en las zonas donde todavía conserva su vitalidad”. Tratando de salir de les polémiques, más tarde editaron otru trípticu baxo’l títulu “El per qué del Bable a les escueles” onde se defendía nun “cargar a los nuesos fíos con una asignatura más” nin enseña-yos “una llingua artificial”.

La so estratexa pasaba por defender la necesidá d’acabar cola represión llingüística nes escueles y a estremar realmente lo que yera castellán de lo que nun lo yera. Esta llinia entraba en clara contradicción colos planteamientos de defensa llingüística de delles organizaciones que formaben parte d’UR como’l MCA. Nesti sentíu destaca l’anécdota difundida na revista Xera en 1982 y que nun pudo ser confirmada poles fuentes, na que Juan Ambou, destacáu militante comunista del exiliu mexicanu, felicitaba a Amelia Valcárcel tres d’un mitin: “Da gusto oírla hablar, señorita, habla usted castellano perfectamente, cómo que no es de esos de Conceyu Bable”.

La candidatura recorrió toa Asturies con decenes de mítines y tuvo qu’enfrentase a los bilordios de tolos sectores de la política asturiana. Por exemplu, llegó a falase de qu’UR quería echar a tolos trabayadores d’orixe non asturianu de les cuenques. Pa otros sectores, tratábase de tolo cotrario, UR yera la estrema esquierda mazcaritada de gaita y tambor. Frente a esto, ún de los principales valores d’UR yera’l principiu de la unidá. Pa encarar les primeres elecciones del reformismu franquista el principal elementu col que contaben les fuercies d’esquierda rupturista yera l’espíritu xunitariu.

Pero al mesmu tiempu esa heteroxeneidá interna foi el talón d’Aquiles de la candidatura. Nella acabaron xuntándose persones y organizaciones con distintes visiones de lo que suponía el “fechu rexonal” y la estratexa a siguir nel futuru políticu, lo que fizo que pa Xosé Lluis García Arias yá dende un entamu esa candidatura fuera un “mangaráu”. Ye bien recordáu el plasmu que causaron ente dalgunos de los asistentes los glayíos pola llibertá de presos sociales o les referencies positives a la Unión Soviética por parte de dellos oradores nos sos mítines.

Nes eleiciones de 1977 en Asturies la candidatura más sigular yera Unidá Rexonalista. Semeya / Archivo La Nueva España (La Transición en Asturias).

El desencantu

Finalmente la candidatura algamó 11.064 votos al Congresu, lloñe del diputáu que como mínimu esperaben sacar y de los dos que-yos llegó a vaticinar la prensa. Pal Senáu algamaron meyores resultaos, siendo l’arquitectu Ramón Fernandez-Rañada Menéndez de Luarca el más votáu de los sos candidatos, con 15.959 votos.

Pesie a que los resultaos tampoco foron tan malos, esti foi el principiu del fin d’UR. Les abondantes deudes contraíes na campaña y la falta d’interés de munchos de los participantes facíen inevitable enterrar el proyeutu. Pero el final tardaría un puquiñín más en llegar. En setiembre de 1977 rexistróse como partíu políticu Unidad Regionalista Asturiana (URA), anque’l recorríu del nuevu partiu foi bien curtiu. El 27 de payares presentábase l’anteproyectu de réximen preautonómicu p’Asturies, que pretendía dar garantíes al exerciciu del drechu del pueblu asturianu al so autogobiernu. Esti proyectu taba impulsáu pol MCA, el PCTA y URA, anque esti últimu fuera una solombra de lo que foi. Alpenes un añu dempués de les elecciones URA dexaba d’existir por inanición, dexando les deudes de la campaña electoral en manos de los xulgaos tres la denuncia de José ‘Cheni’ Uría (MCA). Los débitos ascendíen a 3,5 millones de pesetes que munchos de los impulsores negábense a pagar.

Precisamente, Uría cavilgaba tiempu dempués sobre los problemes que plantegó la candidatura. Pa él yeren claves aspectos como’l programa, l’encabezamientu de les llistes, el desarrollu y financiación de la campaña, asina como la polémica desendolcada tres les elecciones sobre si da-y continuidá o non a la candidatura énte’l fracasu electoral. Pero lo más importante yera ensin duda qu’UR marcaba’l nacimientu ente sectores fundamentalmente mozos, d’una difusa ya inda embrionaria conciencia nacional asturiana y d’una esquierda asturianista que dempués tuvo más proyectos y más partíos, ensin llegar nunca a cuayar, como pasó n’otres Autonomíes. Pero esa ye otra historia.

PUBLICADO EN ATLÁNTICA XXII Nº 51, JULIO DE 2017