Llan de Cubel grabará’l sestu discu ensin Marcos Llope

La cabera actuación de Llan de Cubel nel Celtic Connections de Glasgow el pasau 31 de xineru.

David Artime y Xuan Cándano / Periodistes.

Llan de Cubel, l’históricu grupu asturianu de música tradicional, ta trabayandu nel sestu discu de so carrera de casi trenta y ún años ensin Marcos Llope, el flautista y cantante dende la primer formación. Nos caberos años Llope fue apartándose pasu ente pasu del grupu por motivos personales, ensin qu’hubiera engarradiella nenguna, pero agora la so salida paez decidida dafechu, anque sos collacios nun piesllen la puerta a la so reincorporación cuando-y pete.

Marcos Llope yá nun tocó con Llan de Cubel na cabera actuación del grupu, el pasáu 31 de xineru nel Celtic Connections de Glasgow, onde celebraron con gran éxitu los trenta años del grupu.

El sestu discu de Llan de Cubel, mui esperáu polos sos abondos siguidores -que yá tán avezaos a grandes esperes ente cada trabayu de los intérpretes de cantares como Un tiempu meyor- diba salir l’añu pasáu, pero va con retrasu. Tendrá más d’una docena de temes, la mayoría instrumentales. El retrasu obedez a la falta de lletra pa dos de los cantares.

Cola marcha de Marcos solo quedarán dos músicos de la formación orixinal, Fonsu Mielgu y Elías García. Tamién taben Guzmán Marqués, Chus Bello y Daniel Lombás. Yá nun queda entós nengún pixuetu, porque Marcos y Guzmán son de Cuideiru. Agora la formación compónenla cinco persones: Fonsu, Elías, Xel Pereda, Simon Bradley y Xuan Rodríguez.

Llan de Cubel nun va sustituir a Marcos, sinón que ‘tirará’ de collaboraciones. Yá lo fai dende cuantayá. Nel festival Celtic Connections contaron con una docena de collaboradores, ente ellos flautistes como Mike McGoldrick, de Capercaillie, o Phil Smillie, de los The Tannahill Weavers. Tamién subieron al escenariu otros como’l propiu director artísticu del festival, Donald Shaw (curdión), la mandolina d’Iain Macleod (ex de Shooglenifty), y les percusiones de James Mackintosh (Shooglenifty). Pal nuevu discu los flautistes que collaborarán son Borja Baragaño, Xurde Fernández y Andrea Joglar.

Anque Llan de Cubel ye un grupu de cultu ente los aficionaos al folk n’Asturies, Fonsu Mielgo diz que son “conscientes de que podíemos facer más y que debemos esplicaciones y hasta disculpes a la xente que nos apoya”, y añade que “siguimos coles mesmes idees y cola mesma ilusión pola música que de la qu’entamemos”.

PUBLICADO EN ATLÁNTICA XXII Nº 38, MAYO DE 2015